مفتی افتخار احمد قاسمی آٹھویں مرتبہ جمعیۃ علماء کرناٹک کے صدر منتخب!

 مفتی افتخار احمد قاسمی آٹھویں مرتبہ جمعیۃ علماء کرناٹک کے صدر منتخب! 

✍️ بندہ محمد فرقان عفی عنہ

(ڈائریکٹر مرکز تحفظ اسلام ہند)

خادم القرآن حضرت اقدس مولانا مفتی افتخار احمد صاحب قاسمی دامت برکاتہم کا اتفاق رائے اور بلا مقابلہ جمعیۃ علماء کرناٹک کے صدر کی حیثیت سے آٹھویں مرتبہ انتخاب یقیناً ملت اسلامیہ کے لیے ایک مسرت انگیز اور فخر کا مقام ہے۔ حضرت والا گزشتہ بیس سال سے زائد عرصہ سے اس منصبِ صدارت پر خدمات انجام دے رہے ہیں اور ان کی قیادت میں جمعیۃ علماء کرناٹک نے جو نمایاں دینی، ملی اور سماجی کارنامے انجام دیے ہیں وہ ناقابل فراموش ہیں۔ یہ مسلسل انتخاب ملت کے اعتماد، اہل علم کی دعاؤں اور آپ کی خالص دینی جدوجہد کی واضح دلیل ہے۔

حضرت والا کی شخصیت ملک و بیرون ملک میں کسی تعارف کی محتاج نہیں۔ وہ علم و عمل کے جامع، اخلاق و تواضع کے پیکر، اصول پسندی اور سادگی کے امین اور ملت اسلامیہ ہندیہ کے لیے ایک عظیم قائد ہیں۔ وعظ و نصیحت، درس و تدریس، خطابت و تحریر اور دینی و سماجی میدان میں حضرت والا کی خدمات آبِ زر سے لکھے جانے کے لائق ہیں۔ آپ دارالعلوم دیوبند کے عظیم سپوت اور جنوبِ ہند میں مسلکِ دیوبند کے امین ہیں۔ آپ نے اس خطے میں علمِ دین کی روشنی کو عام کرنے، مدارس و مکاتب کو مستحکم کرنے اور مسلکِ دیوبند کی علمی و فکری خدمات کو نمایاں کرنے میں جو گراں قدر کردار ادا کیا ہے، وہ تاریخ میں ہمیشہ سنہری حروف سے لکھا جائے گا۔ آپ کی قیادت نے جنوبی ہند کے ہزاروں علماء اور لاکھوں عوام کے دلوں میں دینی بیداری اور عملی استقامت پیدا کرنے میں سنگِ میل کی حیثیت اختیار کی ہے۔ یہ بھی حقیقت ہے کہ مرکز تحفظ اسلام ہند کی نمایاں اور ہمہ جہت سرگرمیاں حضرت والا کی سرپرستی، دعاؤں اور رہنمائی کا ثمرہ ہیں۔ مرکز کے ہر مرحلہ میں حضرت والا کی فکر مندی اور مخلصانہ مشورے ادارہ کی کامیابی کی ضمانت بنے ہیں۔

اسی موقع پر حضرت والا کی اجمالی سوانح کا ذکر بھی باعث برکت ہے تاکہ ملت ان کی علمی، دینی اور ملی خدمات سے مزید واقفیت حاصل کرے۔

حضرت مفتی افتخار احمد صاحب قاسمی بن خادم القرآن حضرت مولانا مختار احمد صاحب قاسمی رحمہ اللہ 03 مارچ 1968ء بروز اتوار کو بنگلور (کرناٹک) میں پیدا ہوئے۔ ابتدائی تعلیم مدرسہ عربیہ سراج العلوم میسور روڈ بنگلور سے حاصل کی، وہیں قرآن کریم کا ناظرہ اور 1979ء میں حفظِ قرآن مکمل فرمایا۔ 1984ء میں سی ایم اے ہائی اسکول بنگلور سے میٹرک مکمل کیا۔ اس کے بعد 1985ء میں دارالعلوم سبیل الرشاد بنگلور میں ابتدائی عربی درجات سے تعلیم کا آغاز کیا اور پھر 1989ء میں ام المدارس دارالعلوم دیوبند میں داخل ہوئے، جہاں سے 1992ء میں فراغت حاصل کی اور 1993ء میں تخصص فی الافتاء کی تکمیل فرمائی۔

فراغت کے بعد 1994ء میں حضرت والا نے بسم اللہ مسجد، بسم اللہ نگر، بنگلور میں مدرسہ تعلیم القرآن کے نام سے ایک مکتب قائم کیا اور اسی کے ساتھ جمعہ کی خطابت کی ذمہ داری بھی سنبھالی جو آج تک جاری ہے۔ وقت کے ساتھ یہ مکتب ایک عظیم جامعہ کی شکل اختیار کر گیا جہاں درجنوں طلبہ زیر تعلیم ہیں اور دارالقامہ میں تقریباً 350 بچے مقیم ہیں۔ مزید برآں بسم اللہ نگر سے قریب راگے ہلی میں جامعہ تعلیم القرآن عربک کالج قائم کیا، جہاں اعلیٰ دینی تعلیم کا سلسلہ جاری ہے۔ آج بے شمار مدارس، مکاتب اور ادارے آپ کی سرپرستی میں کامیابی کے ساتھ چل رہے ہیں۔

حضرت والا گزشتہ دو دہائیوں سے زائد عرصہ سے جمعیۃ علماء کرناٹک کے صدر ہیں اور اٹھارہ برسوں سے جمعیۃ علماء ہند کی عاملہ کے رکن کی حیثیت سے بھی نمایاں خدمات انجام دے رہے ہیں۔ آپ کی قیادت میں جمعیۃ علماء کرناٹک نے ریاست بھر میں نہ صرف دینی و تعلیمی خدمات انجام دیں بلکہ سماجی، فلاحی اور رفاہی میدان میں بھی شاندار کارنامے انجام دیے۔

فی الوقت آپ کئی اہم ذمہ داریوں پر فائز ہیں، جن میں:

- بانی و مہتمم جامعہ تعلیم القرآن بنگلور

- خطیب بسم اللہ مسجد، بنگلور

- صدر جمعیۃ علماء کرناٹک

- رکن عاملہ جمعیۃ علماء ہند

- رکن آل انڈیا مسلم پرسنل لا بورڈ

- رکن رابطہ مدارس اسلامیہ کرناٹک

- رکن شوریٰ امارت شرعیہ کرناٹک

- سرپرست مجلس تحفظ ختم نبوت کرناٹک (شاخ دارالعلوم دیوبند)

- سرپرست مرکز تحفظ اسلام ہند

- قاضی محکمہ شرعیہ بسم اللہ نگر

- سرپرست متحدہ محاذ کرناٹک

- رکن مرکزی رویت ہلال کمیٹی کرناٹک

حضرت والا کی یہ ہمہ جہت خدمات ملت اسلامیہ ہندیہ کے لیے ایک عظیم سرمایہ ہیں۔ ان کی ذات علم و عمل، اخلاق و اخلاص، قیادت و سیادت اور خدمت و شفقت کا حسین سنگم ہے۔ وہ آنے والی نسلوں کے لیے ایک روشن نمونہ ہیں اور ملت کے لیے ان کی زندگی کا ہر گوشہ درسِ عمل ہے۔ حضرت والا کی ایک نمایاں خصوصیت یہ ہے کہ آپ نے ہمیشہ دین کے ہر شعبے میں متوازن اور معتدل قیادت فراہم کی۔ آپ نے جہاں مدارس کے استحکام پر زور دیا، وہیں عصری تقاضوں کو بھی نظر انداز نہیں کیا۔ یہی وجہ ہے کہ آپ کی شخصیت علماء اور عوام دونوں کے لیے یکساں طور پر محبوب اور قابلِ اعتماد ہے۔ مزید برآں، آپ کی ملی خدمات صرف کرناٹک یا جنوبی ہند تک محدود نہیں بلکہ پورے ملک کے مختلف خطوں تک پھیلی ہوئی ہیں۔ آپ نے قومی سطح پر بھی ملت اسلامیہ کے مسائل کے حل اور رہنمائی میں گراں قدر کردار ادا کیا ہے۔ آپ کی بصیرت، تدبر اور دعاؤں کے نتیجے میں آج ملت اسلامیہ ایک مضبوط قیادت سے فیضیاب ہو رہی ہے۔

آج 29 ستمبر 2025ء بروز پیر کو بنگلور کی تاریخی مودی مسجد میں ریاستی انتخاب کی مجلس کے دوران جمعیۃ علماء ہند کے قومی صدر حضرت مولانا سید محمود اسعد مدنی مدظلہ العالی کی موجودگی اور جمعیۃ علماء کرناٹک کے ذمہ داران و اراکین کی شرکت میں حضرت مفتی افتخار احمد قاسمی کو جمعیۃ علماء کرناٹک کے صدر کے عہدے کے لیے دوبارہ منتخب کیا گیا۔ ہم اس حسن انتخاب پر نہ صرف حضرت والا کو دلی مبارکباد پیش کرتے ہیں بلکہ دعاگو ہیں کہ اللہ تعالیٰ ان کے سایۂ عافیت اور شفقت کو ملت اسلامیہ اور پوری انسانیت پر دراز فرمائے، ان کے علوم و فیوض اور برکات کو عام فرمائے اور ان کی خدمات کو قبولیتِ کاملہ عطا فرمائے، آمین۔

#IftikharAhmedQasmi #Jamiat #JamiatUlama #MTIH #TIMS #PayameFurqan

وقف بچاؤ دستور بچاؤ تحریک: ملت کا اجتماعی فریضہ!

 وقف بچاؤ دستور بچاؤ تحریک: ملت کا اجتماعی فریضہ!

✍️ بندہ محمد فرقان عفی عنہ

(ڈائریکٹر مرکز تحفظ اسلام ہند)

وقف اللہ کی دی ہوئی ایک عظیم امانت ہے جسے ہمارے بزرگوں نے آنے والی نسلوں کے لیے محفوظ کیا تھا، یہ محض زمین یا جائیداد نہیں بلکہ ہماری تہذیب، دین اور ملی تشخص کی بنیاد ہے۔ وقف کی زمینوں پر تعمیر مساجد، مدارس، خانقاہیں، عیدگاہیں اور قبرستانوں کا استعمال ہر ایک مسلمان کرتا چلا آرہا ہے اور ان وقف کے ادارے نے صدیوں تک مسلمانوں کو تعلیم، روزگار، صحت اور فلاحی سہولیات بھی فراہم کیں اور امت کو اپنے پیروں پر کھڑا رکھا۔ آج جب حکومت وقف املاک پر قبضہ کرنے، ان کے نظام کو توڑنے اور مسلمانوں کو ان کے اپنے اداروں سے محروم کرنے کے لیے وقف ترمیمی قانون 2025 نافذ کرنے کی کوشش کر رہی ہے تو یہ صرف ایک قانونی مسئلہ نہیں بلکہ ملت اسلامیہ کے وجود اور مستقبل کا سوال ہے۔ آل انڈیا مسلم پرسنل لا بورڈ نے حالات کی سنگینی کو محسوس کرتے ہوئے "وقف بچاؤ دستور بچاؤ تحریک" کا آغاز کیا اور اب اس تحریک کا دوسرا مرحلہ ہمارے سامنے ہے، یہ وہ مرحلہ ہے جس میں صرف بیانات اور قراردادیں کافی نہیں بلکہ عملی جدوجہد اور اجتماعی قربانیاں لازمی ہیں۔

آج ہمیں یہ سوچنے کی ضرورت ہے کہ اگر یہ قانون نافذ ہو گیا اور وقف کی جڑیں کاٹ دی گئیں تو ہمارے مدارس، مساجد، خانقاہیں، قبرستانیں، یتیم خانے اور دینی و فلاحی اداروں کو ہڑپ لیا جائے گا؟ یہ قانون ہمارے اجتماعی وجود پر حملہ ہے، ہماری دینی شناخت پر وار ہے اور ہماری آئینی آزادی کو سلب کرنے کی کوشش ہے۔ دستور ہند نے ہمیں مذہبی آزادی دی ہے، اپنے اداروں کو چلانے کا حق دیا ہے اور اپنے مذہبی قوانین کے مطابق زندگی گزارنے کی ضمانت دی ہے، لیکن وقف ترمیمی قانون ان تمام بنیادی حقوق کی خلاف ورزی ہے۔ یہی وجہ ہے کہ آل انڈیا مسلم پرسنل لا بورڈ نے ایک واضح اور منظم روڈ میپ تیار کیا ہے تاکہ اس قانون کو ناکام بنایا جا سکے اور امت کو بیدار کر کے اجتماعی جدوجہد کی جائے۔

آل انڈیا مسلم پرسنل لا بورڈ ہمیں یہ پیغام دیتا ہے کہ ہمیں اپنی تحریک کو محض جذباتی نعروں پر محدود نہیں رکھنا بلکہ عملی اقدامات کے ذریعے آگے بڑھانا ہے۔ ہمیں اپنی مساجد اور مدارس کے منبروں کو بیداری کا ذریعہ بنانا ہے، ہمارے ائمہ اور خطباء کو عوام کے سامنے اس قانون کی حقیقت بیان کرنی ہے اور یہ شعور دینا ہے کہ وقف پر حملہ صرف ایک طبقے یا ادارے پر نہیں بلکہ پوری ملت پر حملہ ہے۔ جب تک ہر فرد اس کو اپنا ذاتی مسئلہ نہیں سمجھے گا تب تک ہماری جدوجہد ادھوری رہے گی۔ ہمیں اپنے نوجوانوں کو اس تحریک کا ہر اول دستہ بنانا ہوگا تاکہ وہ سوشل میڈیا، تعلیمی اداروں اور عوامی مقامات پر اس قانون کے خلاف آواز بلند کریں۔

اسی دوران سپریم کورٹ آف انڈیا نے وقف ترمیمی قانون 2025 کے سلسلے میں جو عبوری فیصلہ سنایا ہے وہ بھی ملت کے لیے تشویشناک پیغام رکھتا ہے۔ عدالت عظمیٰ نے جن دفعات کو برقرار رکھا ہے وہ وقف املاک کی خودمختاری کو نقصان پہنچاتی ہیں اور یہ تاثر دیتی ہیں کہ حکومت وقف کی آزادی کو محدود کر سکتی ہے۔ آل انڈیا مسلم پرسنل لا بورڈ نے اس فیصلے پر گہری تشویش ظاہر کرتے ہوئے کہا ہے کہ یہ فیصلہ دستور ہند کی روح اور بنیادی حقوق کی صریح خلاف ورزی ہے اور اس کے خلاف بھرپور قانونی جدوجہد بھی جاری رکھی جائے گی۔ اس فیصلے نے ہمیں یہ پیغام دیا ہے کہ صرف عدالتوں کے سہارے بیٹھ جانا کافی نہیں بلکہ عوامی بیداری کی ایک بڑی تحریک بھی ساتھ ساتھ چلانا ضروری ہے تاکہ ملک کے انصاف پسند طبقے کو یہ احساس ہو کہ یہ قانون صرف مسلمانوں پر نہیں بلکہ پوری جمہوریت پر حملہ ہے۔

بورڈ کے اس وقف بچاؤ دستور بچاؤ تحریک کے دوسرے مرحلے میں سب سے زیادہ ضرورت اتحاد اور تنظیم کی ہے۔ اختلافات کو بھلا کر ایک پلیٹ فارم پر جمع ہونا آج وقت کی سب سے بڑی ضرورت ہے۔ دشمن ہمارے بکھراؤ سے فائدہ اٹھاتا ہے اور ہمیں کمزور کرنے کی کوشش کرتا ہے، لیکن اگر ہم متحد ہو گئے تو کوئی طاقت ہمیں شکست نہیں دے سکتی۔ ہمیں اپنے سیاسی اور مسلکی اختلافات کو پس پشت ڈال کر صرف ایک بات پر متحد ہونا ہے کہ وقف ہماری امانت ہے اور ہم اسے ہر قیمت پر بچائیں گے۔

یہ وقت قلم اور زبان دونوں کے استعمال کا ہے۔ ہمیں علمی سطح پر دلائل کے ساتھ یہ بات ملک کے عوام کے سامنے رکھنی ہے کہ وقف ترمیمی قانون آئین ہند کے خلاف ہے، یہ بنیادی حقوق پر ڈاکہ ہے اور یہ ایک مخصوص طبقے کے مذہبی اداروں کو نشانہ بنا رہا ہے۔ ہمیں عدالتوں میں اپنی لڑائی لڑنی ہے، ملک کے دانشور طبقے کو اپنے ساتھ کھڑا کرنا ہے، اور میڈیا کے ذریعے سچائی کو سامنے لانا ہے۔ ساتھ ہی ہمیں عوامی سطح پر تحریک کو مضبوط بنانا ہے تاکہ گلی گلی، بستی بستی اور شہر شہر یہ پیغام جائے کہ مسلمان اپنے وقف اور اپنے دستور کے تحفظ کے لیے کھڑے ہیں۔

یہ تحریک صرف مسلمانوں تک محدود نہیں ہونی چاہیے بلکہ ہمیں ملک کے انصاف پسند غیر مسلم بھائیوں کو بھی ساتھ لینا ہے۔ ہمیں انہیں یہ سمجھانا ہے کہ یہ قانون صرف مسلمانوں کے خلاف نہیں بلکہ یہ ملک کے دستور کے خلاف ہے، یہ ایک خطرناک مثال قائم کرے گا جو کل کو کسی اور طبقے کے مذہبی اداروں پر بھی لاگو کی جا سکتی ہے۔ اس لیے یہ تحریک دراصل پورے ملک کی جمہوریت کے تحفظ کی تحریک ہے۔

آل انڈیا مسلم پرسنل لا بورڈ نے اپنے اس روڈ میپ میں وہ تمام عملی اقدامات شامل کیے ہیں جو اس تحریک کو کامیابی کی طرف لے جا سکتے ہیں۔ یہ وقت محض تماشائی بننے کا نہیں بلکہ اپنے حصے کا کردار ادا کرنے کا ہے۔ ہر فرد کو اپنی استطاعت کے مطابق اس میں حصہ لینا ہوگا۔ علماء کو منبروں سے، دانشوروں کو قلم سے، نوجوانوں کو اپنی توانائیوں سے، تاجروں کو اپنے مالی تعاون سے اور عام مسلمانوں کو اپنی موجودگی اور دعاؤں سے اس تحریک کو مضبوط بنانا ہوگا۔ یہ اجتماعی جدوجہد ہی وہ ہتھیار ہے جو اس ظالمانہ قانون کو شکست دے سکتی ہے۔

جدید دور کی یہ بھی ایک حقیقت ہے کہ سوشل میڈیا ایک عظیم محاذ کی شکل اختیار کر چکا ہے اور موجودہ زمانے میں کسی بھی تحریک کا سوشل میڈیا کے بغیر کامیابی تک پہنچنا ممکن نہیں۔ لہٰذا اس تحریک کو بھی کامیاب بنانے کے لیے سوشل میڈیا کا بھر پور استعمال کیا جانا چاہیے، اس کیلئے ٹویٹر پر مربوط مہم چلانا ہوگی، احتجاجی پروگراموں کی لائیو اسٹریمنگ بالخصوص فیس بک اور یوٹیوب پر کرنی ہوگی، اور وقف ترمیمی قانون کی ہر شق کی حقیقت کو چھوٹے چھوٹے کلپس، پوسٹرز اور مضامین کے ذریعے عوام تک پہنچانا ہوگا، نوجوان نسل کو اس میں بھرپور کردار ادا کرنا ہے تاکہ یہ پیغام صرف شہروں تک محدود نہ رہے بلکہ دیہات اور چھوٹے قصبوں تک بھی پہنچ جائے۔ اس مہم کے ذریعے عالمی سطح پر بھی یہ آواز جائے گی کہ ہندوستان کے مسلمان اپنے بنیادی آئینی اور مذہبی حقوق کے تحفظ کے لیے پرامن جدوجہد کر رہے ہیں اور کسی قیمت پر اس کالے قانون کو قبول کرنے پر تیار نہیں۔ اسی کے ساتھ ہی یہ کوشش بھی ہونی چاہیے کہ وقف ترمیمی قانون کے حوالے سے ویب سیریز کے انداز میں معیاری اور مؤثر ویڈیوز تیار کی جائیں جن میں اس قانون کے نقصانات کو واضح انداز میں اجاگر کیا جائے، تاکہ ملک کے باشندے انہیں دیکھ کر وقف کے بارے میں پھیلائی گئی غلط فہمیوں سے نجات حاصل کریں اور اس کالے قانون کے خلاف آواز بلند کرنے کے لیے تیار ہو جائیں۔ علاوہ ازیں وقف بچاؤ دستور بچاؤ تحریک کو مؤثر اور منظم انداز میں آگے بڑھانے کے لیے ضروری ہے کہ مرکزی سطح پر اور جہاں جہاں ممکن ہو ریاستی سطح پر بھی سوشل میڈیا وار روم قائم کیے جائیں تاکہ تحریک کی نگرانی، منصوبہ بندی اور پیغام رسانی جدید تقاضوں کے مطابق کی جا سکے، غلط فہمیوں کا بروقت ازالہ ہو اور ملت کی آواز ہر پلیٹ فارم پر بھرپور انداز میں گونجے۔

 

ہمیں یاد رکھنا چاہیے کہ وقف ہماری تاریخ کی امانت ہے۔ ہمارے بزرگوں نے اپنی زمینیں، اپنی جائیدادیں اور اپنی زندگیاں وقف کر کے یہ ادارے قائم کیے تاکہ آنے والی نسلیں دین پر قائم رہ سکیں۔ آج اگر ہم نے ان اداروں کا تحفظ نہ کیا تو ہم اپنی تاریخ سے بے وفائی کریں گے۔ یہ تحریک دراصل اس امانت کی حفاظت کی تحریک ہے اور ہمیں اپنی پوری طاقت کے ساتھ اس کو کامیاب بنانا ہے۔

یہ وقت ہے کہ ہم اپنی غفلت کی نیند سے جاگ جائیں، اپنی سہل پسندی کو خیرباد کہہ کر قربانی کا راستہ اختیار کریں اور اپنی ذات کے دائرے سے بلند ہو کر ملت کے اجتماعی مفاد کے لیے کھڑے ہوں، کیونکہ اگر آج ہم نے اپنی ذمہ داری ادا نہ کی اور اپنی تاریخ، اپنی تہذیب اور اپنے دین کی امانت یعنی وقف کے تحفظ کے لیے جان و مال اور وقت کی قربانی دینے میں کوتاہی کی تو آنے والی نسلیں ہمیں کبھی معاف نہیں کریں گی اور ہمیں بزدلی اور غفلت کی علامت کے طور پر یاد کریں گی، اس لیے لازمی ہے کہ ہم پوری سنجیدگی اور اخلاص کے ساتھ اس تحریک کو کامیاب بنانے کے لیے اپنی ہر ممکن توانائی جھونک دیں، اپنی زندگی کے قیمتی لمحات اس جدوجہد کے لیے وقف کریں اور اپنے وسائل کو اس مقصد پر قربان کرنے کے لیے تیار ہو جائیں، کیونکہ یہی وہ جذبہ ہے جس نے ماضی میں امت اسلامیہ کو عظیم فتوحات اور کامیابیاں عطا کیں اور آج بھی اگر ہم اسی جذبے کے ساتھ اٹھ کھڑے ہوں تو یقیناً اللہ کی نصرت ہمارے شامل حال ہوگی اور ہم اس کالے قانون کو ناکام بنا کر سرخرو ہوں گے۔

فقط و السلام

بندہ محمّد فرقان عفی عنہ

18؍ ستمبر 2025ء بروز جمعرات

#SaveWaqfSaveConstitution | #WithdrawWaqfAmendments | #WaqfAmendmentAct | #AIMPLB | #PaighameFurqan | #MTIH |#TIMS

عشقِ رسولﷺ: حیاتِ مومن کا سرمایہ!

 عشقِ رسولﷺ: حیاتِ مومن کا سرمایہ!

✍️ بندہ محمد فرقان عفی عنہ 

(ڈائریکٹر مرکز تحفظ اسلام ہند)

عشق رسول ﷺ وہ سرمدی حقیقت ہے جو ایمان کی جان ہے، زندگی کا مرکز ہے اور آخرت کی نجات کا ذریعہ ہے۔ یہ وہ چراغ ہے جو دلوں کے اندھیروں کو روشنی میں بدل دیتا ہے، وہ خوشبو ہے جو روح کے ہر گوشے کو معطر کر دیتی ہے، وہ نغمہ ہے جو سینے کو وجد میں ڈال دیتا ہے اور وہ حقیقت ہے جس کے بغیر ایمان ادھورا اور زندگی بے مقصد ہے۔حضرت محمد مصطفیٰ ﷺ وہ محبوب ہیں جن کی محبت پر کائنات فخر کرتی ہے، وہ رحمت ہیں جن کی رحمت نے زمین و آسمان کو اپنی آغوش میں لیا ہے۔ ان کی ذات وہ مرکز ہے جس پر ہر عاشق اپنی جان و دل نچھاور کرتا ہے اور ہر مومن اپنی عقیدت اور عظمت کا نذرانہ پیش کرتا ہے۔ دنیا کے ہر رشتے میں کمی ہوسکتی ہے، ہر تعلق میں ٹوٹ پھوٹ آسکتی ہے، ہر محبت زوال پذیر ہوسکتی ہے لیکن رسول اللہؐ سے محبت ایسی ہے جو کبھی ختم نہیں ہوتی، جس کی خوشبو قیامت تک باقی رہتی ہے اور جس کی تاثیر دلوں کو ایمان کے نور سے بھر دیتی ہے۔ رسول اللہﷺ کی ذات وہ چراغ ہے جس کے بغیر انسان اندھیروں میں بھٹکتا ہے، وہ مرکز ہے جس کے بغیر انسان کا وجود بکھر جاتا ہے، وہ رحمت ہے جس کے بغیر دنیا قہر و غضب کا شکار ہوجاتی ہے۔ ایمان کا کمال اسی وقت مکمل ہوتا ہے جب رسول اللہﷺ  کی محبت والدین، اولاد، دوستوں اور دنیا کے ہر تعلق سے بڑھ جائے۔ حدیث پاک میں صاف اعلان ہے کہ کوئی شخص اس وقت تک مومن نہیں ہوسکتا جب تک رسول اللہﷺ اسے ہر چیز سے زیادہ محبوب نہ ہوجائیں۔ یہ محبت محض دعوے یا نعرے کا نام نہیں بلکہ یہ دل کی دھڑکن اور زندگی کے ہر عمل میں ظاہر ہونے والی کیفیت ہے۔ محبت کا اصل تقاضا یہ ہے کہ انسان اپنی سوچ کو، اپنے جذبات کو، اپنی عادات کو اور اپنی پوری زندگی کو محمد رسول اللہ ﷺ کی سنت کے مطابق ڈھال دے۔ زبان پر درود و سلام کے نغمے ہوں، دل میں عقیدت کی روشنی ہو اور زندگی کے ہر گوشے میں اتباعِ مصطفیؐ جھلک ہو۔

صحابہ کرام رضوان اللہ علیہم اجمعین اسی عشق کے پیکر تھے۔ ان کے نزدیک دنیا کی کوئی چیز رسول اللہ ﷺ کی رضا اور محبت سے بڑھ کر نہیں تھی۔ بدر و احد کے میدان اسی عشق کے گواہ ہیں کہ کیسے ایک ایک صحابی اپنی جان قربان کرتا مگر حضورﷺ کے قدموں میں قربانی پیش کرنے سے پیچھے نہ ہٹتا۔ حضرت صدیق اکبرؓ کی زندگی سراسر حضور ؐ پر فنا ہونے کی تفسیر تھی، حضرت فاروق اعظمؓ کی غیرت عشقِ رسول ؐ سے سرشار تھی، حضرت عثمان غنیؓ کی بے مثال سخاوت محمد رسول اللہ ؐ کے عشق و محبت کا آئینہ دار تھی، اور حضرت علی المرتضیٰؓ کی جوانی اور شجاعت حضورؐکے قدموں میں قربان ہو کر عشق کی کامل تصویر بن گئی تھی۔ یہ وہ لوگ تھے جن کی رگوں میں خون کی جگہ عشق مصطفیٰ ﷺ دوڑ رہا تھا۔ کیونکہ عشق کا تقاضا یہ ہے کہ انسان اپنی تمام خواہشات، اپنی تمام آرزوئیں، اپنے سارے خواب حضور ؐکی محبت پر قربان کردے۔ یہی وجہ ہے کہ صحابہ کرامؓ کے نزدیک حضور ﷺ کی ایک مسکراہٹ دنیا کے تمام خزانوں سے بڑھ کر تھی۔ وہ آپ ؐ کے وضو کا پانی پینے کے لیے ایک دوسرے پر سبقت لیتے تھے، آپ ؐ کے قدموں کی خاک کو آنکھوں کا سرمہ بناتے تھے، آپ ؐ کے بالوں کو تبرک سمجھ کر محفوظ کرلیتے تھے۔ یہ سب اسی عشق کی علامتیں تھیں جس نے ان کے دلوں کو ایمان سے لبریز کردیا تھا۔

محمد مصطفی ﷺ کی سیرت سراسر رحمت ہے۔ دشمنوں نے آپ کو ستایا، پتھر مارے، وطن سے نکالا لیکن آپ ؐ نے بدلے میں کبھی بددعا نہیں کی، بلکہ ہمیشہ معافی اور رحمت کے دامن کو پھیلایا۔ طائف کے میدان میں لہولہان بدن کے ساتھ بھی یہ دعا کی کہ اے اللہ! ان کی نسل سے وہ لوگ پیدا کر جو تجھ پر ایمان لائیں۔ فتح مکہ کے موقع پر آپ ؐ نے دشمنوں کے سامنے اعلان فرمایا کہ جاؤ تم سب آزاد ہو، حالانکہ یہ وہی دشمن تھے جنہوں نے زندگی بھر اذیتیں دیں۔ یہ رحمت ہی عشق کی سب سے بڑی بنیاد ہے، یہی وہ صفت ہے جس نے دلوں کو کھینچ کر آپ ؐکا دیوانہ بنایا اور آپ کے دشمن بھی معترف ہوگئے۔

عشق کا تقاضا یہ ہے کہ محبوب کی اطاعت کی جائے۔ قرآن کریم نے صاف فرمایا کہ اگر اللہ سے محبت کا دعویٰ کرتے ہو تو رسول اللہﷺ کی اتباع کرو، تبھی اللہ تم سے محبت کرے گا۔ یہی عشق کی اصل ہے، یہی محبت کا ثبوت ہے۔ ورنہ نعرے اور دعوے کھوکھلے ہیں۔ سچا عاشق وہ ہے جو اپنی روزمرہ زندگی میں حضور ؐکی سنت کو زندہ کرے، چاہے وہ کھانے پینے کا طریقہ ہو یا چلنے کا انداز، عبادات ہوں یا معاملات، اخلاق ہوں یا عادات، ہر جگہ محمد رسول اللہ ﷺ کی جھلک نظر آئے۔یہی محبت علماء دیوبند نے اپنے قلوب میں بسائی اور عشق رسول ؐ کی سب سے روشن مثالیں قائم کی۔ ان کے نزدیک دین کی اصل روح اتباع سنت اور عشق رسول ؐ تھی۔ ان کی سادہ زندگی حضور ؐ کی سنتوں کی عملی تصویر تھی۔ انہوں نے جیل کی تاریکیوں میں بھی عشق رسول ؐ کو اپنے دل کی روشنی بنایا۔ ان کی تعلیمات اور اصلاحی مشن عشق رسول ؐکی خوشبو سے معطر تھے۔ یہ وہ علم و حریت کا قافلہ ہے جنہوں نے اپنے قلم اور عمل دونوں سے یہ واضح کیا کہ عشق رسول ؐ کا مطلب صرف عقیدت کا اظہار نہیں بلکہ شریعت کی پابندی، سنتوں کی پیروی اور دین کے غلبے کے لیے قربانی دینا ہے۔عاشق رسول ﷺ کے لیے سب سے بڑی سعادت یہ ہے کہ جب دنیا میں نبی ؐ کی عظمت پر حملے ہوں تو وہ اپنی جان و مال قربان کردے لیکن رسول اللہ ؐکی شان پر آنچ نہ آنے دے۔ یہی عشق ہے جس نے صحابہؓ کو ہر میدان میں فاتح بنایا اور یہی عشق تھا جس نے علماء دیوبند کو غلامی کے اندھیروں میں آزادی کی جدوجہد کے لیے تیار کیا۔ ان کے نزدیک عشق رسول ؐ کا تقاضا تھا کہ ظلم کے سامنے ڈٹ جائیں، باطل کے خلاف علم اٹھائیں اور دین کی عزت کے لیے کوئی قربانی دینے سے نہ گھبرائیں۔

رسول اللہ ﷺ کی ذات وہ پناہ ہے جس کے بغیر دلوں کو سکون نہیں ملتا۔ وہ محبوب ہیں جن کی محبت سے دل زندہ ہوتا ہے، آنکھیں اشکبار ہوتی ہیں، زبان درود و سلام سے تر ہوجاتی ہے اور روح کو وہ لذت نصیب ہوتی ہے جو کسی اور تعلق سے ممکن نہیں۔ ان پر درود و سلام پڑھنے والا دل بیدار ہوجاتا ہے، ان کی سیرت پر غور کرنے والا دل نرم ہوجاتا ہے، ان کی سنت اپنانے والا انسان کامیاب ہوجاتا ہے۔ عشق رسول ؐ وہ سرور ہے جو عاشق کو جھومنے پر مجبور کر دیتا ہے، وہ آگ ہے جو دل کو جلا کر خاکستر کردیتی ہے مگر اس میں ایمان کا نور باقی رکھتی ہے۔ عشق رسول ؐ کے بغیر ایمان کی لذت نہیں، عبادت کی روح نہیں اور زندگی کی راحت نہیں۔ عاشق کے دل میں ہر لمحہ یہی تمنا رہتی ہے کہ کاش میری زندگی بھی سنت کے مطابق ہوجائے، میری آنکھوں کا نور حضور ؐ کا دیدار بن جائے، میرے کانوں کی لذت درود و سلام کی صدائیں ہوں اور میرے دل کا قرار حضور ؐ کی یاد ہو۔ یہ عشق ہی ہے جو ایک عام انسان کو ولی بنادیتا ہے، غلام کو آقا کے قریب کردیتا ہے، اور گناہگار کو مغفرت کے دروازے تک پہنچادیتا ہے۔ یہی عشق ہے جو روزِ محشر نجات کی ضمانت ہے۔ حضور ؐ کی شفاعت اسی کو نصیب ہوگی جو دل و جان سے آپ ؐکا عاشق ہوگا، جو اپنی زندگی کو آپ ؐ کی سیرت کے مطابق گزارے گا اور جو آپ ؐ کے نام پر اپنی جان بھی قربان کردے گا۔

کون سا عاشق رسول ﷺ ہے جو یہ سن کر نہ تڑپے کہ روزِ قیامت جب سب لوگ ایک دوسرے سے دور بھاگ رہے ہوں گے، وہاں صرف ایک ہستی ہوگی جو“امتی! امتی!”کی صدا لگائے گی، اور وہ ہستی ہے محمد مصطفیﷺ کی۔ اس دن سچے عاشقوں کی آنکھیں ٹھنڈی ہوں گی کہ ہم جس کے دیوانے تھے وہی ہماری شفاعت کے لیے کھڑا ہے، مگر یہ حقیقت ہمیں سوچنے پر بھی مجبور کرتی ہے کہ کیا محض عاشق رسول ؐ ہونے کا دعویٰ کافی ہے؟ اگر ہماری زندگی سنت مصطفیؐ سے خالی ہے، اگر ہماری عادات و معاملات شریعت کے مطابق نہیں، اگر ہمارے دل و دماغ نبی ؐ کے نقش قدم سے محروم ہیں، تو پھر ہمارا دعویٰ عشق ایک بے جان صدا بن کر رہ جائے گا۔ سچا عاشق وہی ہے جو اپنے محبوب ؐ کے ہر فرمان کو دل سے قبول کرے، اپنی ذات کو ان کے دین پر قربان کرے اور اپنی زندگی کو حضور ؐ کی سنتوں کی خوشبو سے معطر کرے، تبھی قیامت کے دن رسول اللہ ؐ کی شفاعت نصیب ہوگی اور آنکھوں کو وہ ٹھنڈک ملے گی جس کا خواب ہر مومن اپنے دل میں سجائے بیٹھا ہے۔

یہی وہ پیغام ہے جو صحابہؓ نے دیا، یہی وہ تعلیم ہے جو علماء دیوبند نے آگے بڑھائی اور یہی وہ راستہ ہے جو ہر مومن کو اختیار کرنا ہے۔ رسول اللہ ﷺ سے محبت ایمان کا سر ہے، عشق ایمان کی جان ہے اور اتباع اس کی حقیقت ہے۔ اگر یہ تینوں چیزیں جمع ہوجائیں تو انسان کی زندگی نور سے بھر جاتی ہے اور اس کا انجام جنت الفردوس میں رسول اللہ ﷺ کی رفاقت کے ساتھ ہوتا ہے۔

قوت عشق سے ہر پست کو بالا کر دے

دہر میں اسم محمد ﷺ سے اجالا کر دے

#ProphetMohammed | #Muhammad | #RabiulAwwal | #Madina | #PaighameFurqan | #MTIH | #TIMS

آسام کی بدلتی سیاست، مولانا محمود مدنی کی للکار اور ہیمنت بسوا سرما کی بوکھلاہٹ!

 آسام کی بدلتی سیاست، مولانا محمود مدنی کی للکار اور ہیمنت بسوا سرما کی بوکھلاہٹ!

✍️ بندہ محمد فرقان عفی عنہ

(ڈائریکٹر مرکز تحفظ اسلام ہند)

آج کے ہندوستان میں اقتدار کی کرسی پر بیٹھے کچھ لوگ جب زبان کھولتے ہیں تو ایسا لگتا ہے کہ یہ جمہوری ملک نہیں بلکہ کسی آمریت کی چراگاہ ہے، جہاں قانون، انصاف اور آئین کے بجائے غرور، تعصب اور طاقت کی زبان بولی جاتی ہے۔ آسام کے وزیر اعلیٰ ہیمنت بسوا سرما کا جمعیۃ علماء ہند کے صدر مولانا محمود اسعد مدنی کے خلاف زبان درازی کرتے ہوئے یہ کہنا کہ ”اگر مجھے مولانا محمود مدنی مل گئے تو میں انہیں بنگلہ دیش بھیج دوں گا“ دراصل اسی زہریلی ذہنیت کی عکاسی ہے۔ یہ جملہ نہ صرف ایک مذہبی قائد کی توہین ہے بلکہ پورے ہندوستانی مسلمانوں کی عزت و وقار کو للکارنے کے مترادف ہے۔ یہ وہی ملک ہے جس کے آئین نے سب کو برابری کا حق دیا، لیکن آج حکمرانوں کی زبان سے ایسے جملے نکل رہے ہیں جو نہ صرف آئین بلکہ انسانیت کی بھی توہین ہیں۔ اس بیان نے صاف کر دیا ہے کہ آسام میں جو کچھ ہو رہا ہے وہ زمین بازیابی یا تجاوزات ہٹانے کا معاملہ نہیں بلکہ ایک خاص مذہبی طبقے کو نشانہ بنانے کی منظم سازش ہے۔

جمعیۃ علماء ہند کی مجلس عاملہ نے گزشتہ دنوں مولانا محمود مدنی کی صدارت میں بروقت اور برمحل قدم اٹھاتے ہوئے وزیر اعلیٰ آسام کو معطل کرنے اور ان پر ہیٹ اسپیچ کے مقدمات درج کرنے کا مطالبہ کیا۔ یہ وہی جمعیۃ ہے جو اپنے قیام 1919ء سے آج تک ہندوستانی مسلمانوں کے لیے ڈھال بنی ہوئی ہے۔ اس کی تاریخ میں قربانیوں کے ایسے ایسے باب درج ہیں جن پر پوری ملت فخر کرتی ہے۔ آزادی کی تحریک سے لے کر بعد آزادی کے نازک ترین مواقع تک، جب بھی ملک میں مسلمانوں یا اقلیتوں کو نشانہ بنایا گیا یا ان کے مذہبی و آئینی حقوق پر شب خون مارنے کی کوشش کی گئی، جمعیۃ ہمیشہ سب سے آگے کھڑی رہی۔ شیخ الاسلام مولانا حسین احمد مدنیؒ کی بے مثال جدوجہد اور ان کی جرأت مندی آج بھی تاریخ کے اوراق پر جگمگا رہی ہے۔ انہوں نے انگریز سامراج کے خلاف قیادت کی، جیلیں کاٹیں، تعذیبیں برداشت کیں مگر حق گوئی اور استقلال سے پیچھے نہ ہٹے۔ وہ اس نظریے کے داعی تھے کہ یہ ملک ہندو مسلم سب کا ہے اور سب کو ساتھ مل کر اس کی حفاظت کرنی ہے۔ انہی کی اولاد مولانا محمود اسعد مدنی آج اسی حوصلے اور عزم کے ساتھ اپنے بزرگوں کی وراثت کو آگے بڑھا رہے ہیں۔ جس شخص کے دادا نے ہندوستان کی آزادی اور مسلمانوں کے وقار کے لیے اپنی زندگی قربان کی، اس کے پوتے کو بنگلہ دیش بھیجنے کی دھمکی دینا نہ صرف بدزبانی ہے بلکہ اپنی سیاسی پستی اور بوکھلاہٹ کا اعتراف بھی ہے۔

آسام کے حالات گواہی دے رہے ہیں کہ انخلا کے نام پر ظلم کی ایسی داستان لکھی جا رہی ہے جس کی مثال شاید ہی کہیں اور ملے۔ پچاس ہزار خاندانوں کو گھروں سے محروم کر کے کھلے آسمان تلے بے یار و مددگار چھوڑ دیا گیا۔ اور یہ سب کچھ اس دعوے کے ساتھ کیا گیا کہ یہ لوگ غیر قانونی بنگلہ دیشی ہیں، جب کہ اب تک اجاڑے گئے سب خاندان سو فیصد مسلمان ہیں۔ وزیر اعلیٰ کا یہ اعتراف کہ ”ہم صرف میاں مسلمانوں کو بے دخل کر رہے ہیں“ اس بات کی کھلی دلیل ہے کہ یہ سب کچھ محض انتظامی کارروائی نہیں بلکہ خالص مسلم دشمنی ہے۔ کیا یہ بیان آئین ہند کی روح سے کھلا مذاق نہیں؟ کیا یہ سپریم کورٹ کی واضح گائیڈ لائنز کی صریح خلاف ورزی نہیں؟ جمعیۃ علماء ہند نے نہایت متوازن اور اصولی موقف اختیار کرتے ہوئے کہا کہ وہ کبھی بھی سرکاری زمین پر ناجائز قبضے کی حامی نہیں رہی، لیکن موجودہ بے دخلی کی مہم انصاف اور انسانی ہمدردی کے تمام تقاضوں کو روندتے ہوئے ایک مخصوص طبقے کو نشانہ بنانے کا ثبوت ہے۔ یہی وہ اصولی رویہ ہے جس نے ہمیشہ جمعیۃ کو دوسروں سے ممتاز کیا ہے۔ ماضی قریب میں جب آسام کے چالیس لاکھ شہریوں کو ان شہریت سے محروم کرنے کی سازش کی گئی۔ اس نازک موقع پر جمعیۃ علماء ہند نے میدان میں آ کر بھرپور جدوجہد کی۔ قانونی اور عوامی محاذ پر مضبوط دلائل کے ساتھ آواز بلند کی۔ نتیجہ یہ ہوا کہ حکومت کی سازش ناکام ہوئی اور انصاف کی جیت ہوئی۔ یوں جمعیۃ علماء ہند نے چالیس لاکھ آسامیوں کو ان کا حق دلا کر تاریخ رقم کی جس کو آج ہر طرف سراہا جاتا ہے۔

اصل حقیقت یہ ہے کہ آسام کے وزیر اعلیٰ ہیمنت بسوا سرما کی حکومت بدعنوانی اور اقربا پروری میں دھنسی ہوئی ہے۔ گروکھوتی کثیر مقصدی زرعی منصوبہ (Garukhuti Multipurpose Agricultural Project) کی مثال آج بھی سامنے ہے، جس میں ہزاروں مسلم گھرانوں کو اجاڑ کر زمین حاصل کی گئی اور پھر گائے کے نام پر ایسا گھپلا کیا گیا جس نے حکومت کی نیت کو بے نقاب کر دیا۔ کروڑوں روپے کی لاگت سے خریدی گئی گائیں یا تو مر گئیں یا وزیروں اور ایم ایل ایز کے فارم ہاؤسوں پر پہنچا دی گئیں۔ عوام کا پیسہ لوٹا گیا اور کسانوں کو فریب دیا گیا۔ یہ سب کچھ ”گؤ ماتا“ کے تحفظ کے نام پر کیا گیا، مگر اصل مقصد سیاسی اور مالی مفادات سمیٹنا تھا۔اس مسئلہ کو اپوزیشن نے پورے آسام میں گرما رکھا ہے۔

اسی کے ساتھ اگلے سال 2026ء میں آسام کے اسمبلی انتخابات کے پیش نظر آسام کی سیاست میں اس وقت جو منظرنامہ ابھر رہا ہے، وہ ہیمنت بسوا سرما کی گھبراہٹ اور بوکھلاہٹ کو کھول کر سامنے لے آ رہا ہے۔ کانگریس کے گورو گگوئی کی بڑھتی ہوئی مقبولیت، ان کی شفاف شبیہ اور عوامی حمایت نے بی جے پی کے مضبوط قلعے میں دراڑیں ڈال دی ہیں۔ یہی وجہ ہے کہ سرما کبھی ان پر بے بنیاد الزامات لگاتے ہیں، تو کبھی مسلمانوں کو کھلے عام دھمکیاں دے کر اپنی بے بسی چھپانے کی کوشش کرتے ہیں۔ حقیقت یہ ہے کہ یہ جارحانہ لب و لہجہ دراصل ان کے دل میں گھر کرتی اس سیاسی خوف کا اظہار ہے، جو بدلتی ہوئی فضاؤں نے ان پر طاری کر دیا ہے۔ آسام میں بی جے پی کے پاس بلاشبہ عددی طاقت موجود ہے، لیکن اقتدار مخالف لہر، بدعنوانی کے الزامات، اندرونی اختلافات اور عوامی ناراضگی نے اس طاقت کو کھوکھلا بنا دیا ہے۔ سرما کے لیے یہ وقت سخت آزمائش کا ہے، کیونکہ شمال مشرق کی سیاست میں منی پور سمیت مختلف ریاستوں کے بحرانوں نے بی جے پی کی قیادت کو مشکوک بنا دیا ہے۔ آج وہ جس اعتماد کے ساتھ بی جے پی کے واحد مضبوط چہرے کے طور پر ابھرتے تھے، وہ اعتماد تیزی سے ٹوٹ رہا ہے۔ دلچسپ پہلو یہ ہے کہ اگر بی جے پی آسام کے انتخابات جیت بھی لے تو اندرونی حالات اور قیادت کے بحران کے باعث ممکن ہے کہ ہمنتا بسوا سرما کو اقتدار کی کرسی سے محروم ہونا پڑے۔ گویا آسام کی بدلتی ہوا نہ صرف بی جے پی کے لیے دردِ سر بنتی جارہی ہے بلکہ خود سرما کی سیاسی بقا پر بھی سوالیہ نشان لگا رہی ہے۔ یہی وجہ ہے کہ ہیمنت بسوا سرما اپنی اقتدار کی کرسی بچانے کے لیے کبھی مسلمانوں کو دھمکیاں دیتے نظر آتے ہیں اور کبھی ملت اسلامیہ ہندیہ کی رہنما تنظیم جمعیۃ علماء ہند اور اس کی قیادت پر زہر افشانی کرتے دکھائی دیتے ہیں۔ ان کے دھمکی آمیز جملے دراصل اس گھبراہٹ کا اعتراف ہیں جو آسام کی بدلتی ہوئی سیاسی فضا نے ان کے دل میں پیدا کر دی ہے۔ 

آج دنیا فلسطین میں جاری نسل کشی بھی دیکھ رہی ہے جہاں مسلمانوں کو ان کی زمینوں سے محروم کیا جا رہا ہے، اور آسام کی کہانی بھی کچھ اسی طرح ہے۔ ایک طرف اسرائیل کے ٹینک اور بم فلسطینی گھروں کو مٹا رہے ہیں، دوسری طرف آسام میں بے دخلی کی آڑ میں مسلمانوں کے مکانات اجاڑے جا رہے ہیں۔ جمعیۃ علماء ہند نے اپنے اجلاس میں دونوں مسائل کو اٹھا کر یہ ثابت کر دیا ہے کہ وہ صرف ہندوستانی مسلمانوں کی نمائندہ نہیں بلکہ پوری ملت اسلامیہ کی آواز ہے۔ یہی وہ جرأت ہے جو جمعیۃ کو تاریخ کے روشن ابواب میں جگہ دیتی ہے۔ دارالعلوم دیوبند کے عظیم سپوت شیخ الہندؒ اور شیخ الاسلام مولانا مدنیؒ نے جو چراغ جلایا تھا وہ آج بھی بجھا نہیں، اور مولانا محمود مدنی جیسے جانشین اسی روشنی کو آگے بڑھا رہے ہیں۔ ہیمنت سرما لاکھ شور مچائیں، انگوٹھا دکھائیں یا دھمکیاں دیں، وہ اس حقیقت کو نہیں بدل سکتے کہ جمعیۃ علماء ہند کی جڑیں اس ملک کی مٹی میں اتنی گہری ہیں کہ کوئی آندھی انہیں اکھاڑ نہیں سکتی۔

وقت کا تقاضا ہے کہ ملک کے انصاف پسند ادارے اور عدلیہ آگے بڑھیں۔ اگر آج ہیمنت بسوا سرما جیسے وزرائے اعلیٰ کو لگام نہ دی گئی تو کل آئین اور انصاف کا جنازہ اٹھ جائے گا۔ جمعیۃ کا مطالبہ بالکل بجا ہے کہ وزیر اعلیٰ کو برطرف کیا جائے، ان پر ہیٹ اسپیچ کے مقدمات درج ہوں، اور متاثرہ خاندانوں کی بازآبادکاری فوری کی جائے۔ جمعیۃ علماء ہند نے ہمیشہ حق کا پرچم بلند رکھا ہے اور آج بھی یہ پرچم سر بلند ہے۔ یہ جدوجہد صرف مسلمانوں کے لیے نہیں بلکہ ہندوستان کی جمہوریت اور آئین کے تحفظ کے لیے ہے۔ ظلم اور دھمکیاں کبھی حق کی روشنی کو بجھا نہیں سکتیں، بلکہ وہ روشنی مزید تیز ہو کر ظلم کی اندھیری رات کو چیر دیتی ہے۔ ہیمنت بسوا سرما کی بوکھلاہٹ اس بات کی دلیل ہے کہ آسام میں رات کی تاریکی ختم ہونے والی ہے اور صبحِ روشن قریب ہے!

فقط و السلام

بندہ محمّد فرقان عفی عنہ

30؍ اگست 2025ء بروز سنیچر

+918495087865

mdfurqan7865@gmail.com

#Assam | #MahmoodMadni | #HimantBiswaSharma | #AssamDemolition | #PaighameFurqan | #MTIH | #TIMS

ہندوستان کی جنگ آزادی میں مسلمانوں کا کردار!

 ہندوستان کی جنگ آزادی میں مسلمانوں کا کردار!

✍️ بندہ محمد فرقان عفی عنہ

(ڈائریکٹر مرکز تحفظ اسلام ہند)

ہندوستان کی جنگ آزادی کی تاریخ جب کسی غیر جانبدار نظر سے پڑھی جائے تو یہ حقیقت روزِ روشن کی طرح عیاں ہو جاتی ہے کہ اس سرزمین کی آزادی کا چراغ سب سے پہلے مسلمانوں نے جلایا، اس کی حفاظت کے لیے اپنے خون کی ندیاں بہائیں اور صدیوں تک اس چراغ کو بجھنے نہ دیا۔ برصغیر میں انگریزوں کے قدم جمائے جانے کے ساتھ ہی مسلمانوں نے نہ صرف ان کی غلامی کو مسترد کیا بلکہ اس کے خلاف اعلانِ جہاد کر کے اس ملک میں آزادی کی ایک ایسی جدوجہد کا آغاز کیا جو تقریباً دو صدی سے زائد عرصہ تک جاری رہی۔ یہ وہ جدوجہد تھی جس کی بنیاد اسلام کے تصورِ آزادی اور جہاد میں مضمر تھی۔ مسلمان اس حقیقت پر یقین رکھتے تھے کہ غلامی انسانیت کی توہین ہے اور ایک مسلمان کی زندگی کا مقصد یہ ہے کہ وہ اللہ کے سوا کسی کا غلام نہ ہو۔ یہی عقیدہ تھا جس نے ان کے دلوں میں غیرت و حمیت کا وہ شعلہ بھڑکایا جس کی روشنی سے پورا برصغیر منور ہوا۔

سترہویں صدی سن 1754ء میں نواب سراج الدولہؒ کے نانا علی وردی خان نے کلکتہ کے فورٹ ولیم پر حملہ کر کے انگریزوں کو شکست دی اور انہیں ڈائمنڈ ہاربر میں پناہ لینے پر مجبور کیا، جسے ملک کی پہلی منظم مسلح جنگ آزادی کہا جا سکتا ہے۔ علی وردی خان کے بعد سراج الدولہؒ حکمران بنے اور انگریزوں کے بڑھتے خطرے کو ختم کرنے کا عزم کیا، مگر دربار کی سازشوں کے باعث 1757ء میں پلاسی کی جنگ میں شکست ہوئی اور مرشدآباد میں شہید کر دیے گئے۔ اس طرح بنگال کے نواب سراج الدولہؒ نے انگریز سامراج کے خلاف میدان سنبھالا اور پلاسی کی جنگ میں اپنی جان دے کر اس ملک میں آزادی کی پہلی اینٹ رکھی۔

اسی طرح جنوب ہند دکن کے عظیم فرمانروا حیدر علیؒ (م 1782ء) اور ان کے فرزند سلطان ٹیپو شہیدؒ برصغیر کی جنگ آزادی کے وہ عظیم مجاہد تھے جو ہمیشہ انگریزوں کے لیے خطرہ بنے رہے۔ والد کے انتقال کے بعد سلطان ٹیپو ؒ نے 1783ء میں انگریزوں کے خلاف پہلی جنگ لڑی اور انگریزوں کو شکست دیا، اس کے بعد کئی جنگیں ہوئی اور سلطنتِ میسور کے شیر، سلطان ٹیپو شہیدؒ اپنے تخت و تاج کی پرواہ کیے بغیر انگریزوں کے سامنے سیسہ پلائی دیوار بننے کے عہد پر قائم رہے۔ اور بالآخر 1799ء میں اپنی جان قربان کر کے اس حقیقت کو ثابت کیا کہ ایک مسلمان حکمران کے لیے غلامی قبول کرنے سے بہتر ہے کہ وہ میدانِ جنگ میں شہادت کو گلے لگا لے۔

اس کے بعد اٹھارویں صدی کے اوائل یعنی 1803ء میں شاہ عبدالعزیز محدث دہلویؒ نے ”فتویٰ“ دیا کہ ہندوستان دارالحرب بن چکا ہے اور یہاں انگریزوں کے خلاف جہاد فرض ہے۔ یہ فتویٰ محض ایک دینی رائے نہیں تھی بلکہ ایک عملی اعلانِ جنگ تھا، جس نے لاکھوں مسلمانوں کے دلوں میں بغاوت کی آگ بھڑکا دی۔ اس فتوے کا اثر یہ ہوا کہ انگریزوں کے خلاف ہر گوشے سے مزاحمت اٹھنے لگی۔ یہ مزاحمت صرف زبانی نعروں تک محدود نہ تھی بلکہ خون اور جانوں کی قربانی سے مزین تھی۔ چنانچہ سن 1831ء میں سید احمد شہیدؒ اور شاہ اسماعیل شہیدؒ ”بالاکوٹ کے میدان“ میں انگریزوں کے خلاف جہاد میں شہید ہوئے، مگر ”لبریشن تحریک“ مولانا نصیرالدین دہلویؒ، پھر مولانا ولایت علی عظیم آبادیؒ (م1852ء) اور مولانا عنایت علی عظیم آبادیؒ (م1858ء) کی قیادت میں جاری رہی اور بالآخر 1857ء کی جنگ آزادی تک پہنچی۔

انگریزوں کے خلاف یہ معرکہ محض حکمرانوں تک محدود نہ رہا بلکہ عوام الناس، علماء، صوفیاء، اور دیندار طبقے نے بھی اس میں حصہ لیا۔ انگریزوں کی ریشہ دوانیوں، عیاریوں اور سازشوں کے باوجود مسلمانوں نے اپنی جدوجہد ترک نہ کی۔ 1857ء کی جنگ آزادی کو جسے تاریخ میں پہلی جنگ آزادی کہا جاتا ہے تو درحقیقت یہ وہ آگ تھی جو ایک صدی سے جل رہی تھی اور اس کی لو کو تیز کرنے والوں میں مسلمانوں کا کردار نمایاں تھا۔ شاہ ولی اللہ محدث دہلویؒ، شاہ عبدالعزیز محدث دہلویؒ، شاہ اسحاق محدث دہلویؒ اور ان کے شاگردوں کی طویل محنت کے نتیجے میں علماء کی ایک جماعت تیار ہوئی اور اس جنگ میں انہوں نے قیادت کی اور ہر محاذ پر انگریزوں کو للکارا۔ ”شاملی کا میدان“ جس کے امیر حاجی امداللہ مہاجر مکیؒ تھے اور جس کی قیادت حجۃ لاسلام مولانا قاسم نانوتویؒ اور مولانا رشید احمد گنگوہیؒ فرما رہے تھے، انہوں اپنے قلیل وسائل کے باوجود انگریز فوج کا مقابلہ کیا تو یہ دراصل اس عزم کا اعلان تھا کہ آزادی کی راہ میں جان و مال کی کوئی قربانی بڑی نہیں۔ اسی معرکے میں حافظ ضامنؒ سمیت کئی علماء شہید ہوئے۔ 1857ء کی جنگ میں مسلمانوں کو بظاہر شکست ہوئی، مگر درحقیقت یہ شکست نہیں بلکہ ایک طرح کی فتح تھی۔ اس جنگ آزادی کی ناکامی کے بعد انگریزوں نے اسلام پر حملہ کرتے ہوئے اس کے عقائد، فکر اور تہذیب کو ہندوستان سے مٹانے کا فیصلہ کر لیا، لیکن یہی وہ فیصلہ تھا جس سے انگریزوں کے زوال کا آغاز ہوا۔ چنانچہ اسلام کے خلاف اس سازش کو بھانپتے ہوئے مولانا قاسم نانوتوی اور انکے رفقاء اکابرین دیوبند نے 30؍ مئی 1866ء کو ”دارالعلوم دیوبند“ کی بنیاد رکھی گئی، جو محض ایک دینی درسگاہ نہ تھی بلکہ ایک فکری و عملی قلعہ تھی جہاں آزادی، خودداری اور دینی غیرت کی شمع جلائی جاتی رہی۔ اس ادارے نے نہ صرف دینی علوم کی حفاظت کی بلکہ آزادی کی تحریک کو ایک فکری و نظریاتی بنیاد فراہم کی، جس نے آنے والے عشروں میں ہزاروں مجاہدین آزادی کو تیار کیا۔شیخ الہند مولانا محمود حسن دیوبندیؒ، شیخ الاسلام مولانا حسین احمد مدنیؒ، مولانا عبید اللہ سندھیؒ جیسے عظیم سپوتوں نے آزادی کی جدوجہد کو نہ صرف برصغیر بلکہ عالمی سطح پر بھی جوڑا۔ مالٹا کی جیل میں شیخ الہند اور شیخ الاسلام نے سالہا سال قید و بند کی صعوبتیں برداشت کیں لیکن ان کے عزم و حوصلے کو توڑنا ممکن نہ ہوا۔ انگریزوں کے خلاف 1912ء میں شروع ہونے والی ان کی ”تحریک ریشمی رومال“ خفیہ منصوبہ بندی سے لے کر خلافت موومنٹ تک پھیلی ہوئی تھی، جس نے مسلمانوں کے دلوں میں ایک نیا ولولہ پیدا کیا۔ سن 1919ء میں شیخ الہند کے شاگردوں نے ”جمعیۃ علماء ہند“ کی بنیاد رکھی اور اسکے پلیٹ فارم سے آزادی کی جدوجہد کو منظم کیا اور مسلمانوں کو یہ باور کرایا کہ آزادی محض ایک سیاسی ضرورت نہیں بلکہ ایک دینی فریضہ ہے۔ انہیں ایام میں ”تحریکِ خلافت“ وجود میں آئی، جس کے بانی مولانا محمد علی جوہرؒ تھے، اس تحریک سے ہندو مسلم اتحاد عمل میں آیا۔ گاندھی جی اور مسلم رہنماؤں نے ایک ساتھ ملک گیر دورہ کیا، اس تحریک نے عوام اور مسلم علماء کو ایک پلیٹ فارم پر کھڑا کردیا۔ اور ادھر مالٹا کی جیل سے شیخ الہند کی رہائی کے بعد سب سے پہلے 29؍ جولائی 1920ء کو ”ترکِ موالات“ کا فتوی شائع کیا گیا۔ اس کے بعد 29؍ دسمبر 1929ء کو امرتسر میں رئیس الاحرار مولانا حبیب الرحمن لدھیانویؒ اور امیر شریعت مولانا عطاء اللہ شاہ بخاریؒ نے آزادی کی تحریک کو مضبوط کرنے کیلئے ایک اور تحریک کا اعلان کرتے ہوئے ”مجلس احرار اسلام ہند“ کی بنیاد رکھی۔ یوں مختلف تحریکوں اور تنظیموں کے پرچم تلے مسلمانوں نے آزادی کی شمع روشن رکھی، اور دارالعلوم دیوبند و جمعیۃ علماء ہند جیسے اہم پلیٹ فارمز سے انگریز سامراج کے خلاف مسلسل بھرپور آوازیں بلند ہوتی رہیں۔ اور بالآخر 15؍ اگست 1947ء کے دن وطن عزیزبھارت کو انگریزوں سے مکمل آزادی ملی۔

یہ حقیقت بھی تاریخ کا ایک سنہری باب ہے کہ آزادی کی اس طویل جدوجہد میں ایک صدی تک مسلمان عملاً تن تنہا میدان میں ڈٹے رہے۔ انگریز حکومت نے ہر ممکن کوشش کی کہ مسلمانوں کی قیادت کو ختم کیا جائے، ان کے تعلیمی ادارے بند کیے جائیں، ان کے دینی شعائر کو مٹایا جائے اور ان کے تشخص کو مسخ کیا جائے، لیکن مسلمانوں نے ہمت نہ ہاری۔ چاہے وہ 1857ء کے شہداء ہوں، چاہے بالا کوٹ کے میدان میں سید احمد شہیدؒ اور شاہ اسماعیل شہیدؒ کا خون ہو، یا پھر 1920ء کی جمعیۃ علماء ہند، تحریک خلافت کے جلسے اور جلوس؛ ہر مقام پر مسلمانوں نے اپنے ایمان اور عزم کا ثبوت دیا۔ اس جدوجہد کے نتیجے میں آزادی کی وہ فضا پیدا ہوئی جس میں دوسرے طبقات نے بھی اپنے حصے کا کردار ادا کرنا شروع کیا، لیکن حقیقت یہ ہے کہ اس فضا کو قائم رکھنے اور پروان چڑھانے والے مسلمان ہی تھے۔

آج افسوس کا مقام یہ ہے کہ جن مسلمانوں نے اپنی جانوں کی قربانی دے کر اس ملک کو آزادی دلائی، ان ہی سے آج محب وطن ہونے کا سرٹیفکیٹ طلب کیا جا رہا ہے۔ یہ سوال ان زبانوں سے اٹھ رہا ہے جن کا اس جنگ آزادی میں دور دور تک کوئی کردار نہ تھا، بلکہ بعض کے آبا و اجداد انگریزوں کے وفادار رہے اور آزادی کی تحریک کو کچلنے میں انگریزوں کے مددگار بنے۔ تاریخ کے یہ سیاہ کردار آج اس حد تک جری ہو گئے ہیں کہ ملک کی آزادی کے اصل محافظوں کو شک کی نگاہ سے دیکھتے ہیں، ان کے مذہبی شعائر پر قدغن لگاتے ہیں، ان کے تعلیمی اداروں کو نشانہ بناتے ہیں اور ان کے بنیادی حقوق کو پامال کرتے ہیں۔لیکن تاریخ کا ایک اور سبق یہ بھی ہے کہ مسلمانوں نے جب بھی ظلم و جبر کے سائے تلے زندگی گزاری، انہوں نے آزادی کے لیے جدوجہد کی اور اپنی جان و مال قربان کیے۔ اگر آج بھی حالات اس نہج پر پہنچ جائیں کہ ظلم اپنی انتہا کو چھو لے اور انصاف کا چراغ بجھنے لگے، تو وہی مسلمان جو کل انگریزوں کے خلاف سینہ سپر تھے، آج کے ظالموں کے خلاف بھی میدان میں ہوں گے۔ کیونکہ ان کے خون میں وہی غیرت، وہی حمیت اور وہی جذبہ موجزن ہے جو سلطان ٹیپو شہیدؒؒ، مولانا قاسم نانوتویؒ، مولانا رشید احمد گنگوہیؒ، شیخ الہند مولانا محمود حسن دیوبندیؒ اور مولانا حسین احمد مدنیؒ کے رگ و پے میں دوڑتا تھا۔

ہندوستان کی آزادی کی کہانی محض سیاسی جملوں یا سرکاری نصاب کی محدود سطروں میں بیان نہیں کی جا سکتی۔ یہ کہانی شہادتوں، قربانیوں اور جدوجہد کے ان ابواب پر مشتمل ہے جنہیں مسلمانوں کے خون سے لکھا گیا۔ یہ کہانی ان بزرگوں کی ہے جنہوں نے قید و بند کی صعوبتیں برداشت کیں، پھانسی کے پھندوں کو بوسہ دیا، جلاوطنی کو گلے لگایا اور اپنی نسلوں کو غلامی سے بچانے کے لیے سب کچھ قربان کر دیا۔ اور یہ کہانی ہمیں یہ یاد دلاتی ہے کہ محب وطن وہ نہیں ہوتے جو صرف زبانی دعوے کریں بلکہ وہ ہیں جو آزادی کی قیمت اپنے خون سے ادا کریں۔ 

لہٰذا آج اگر کوئی مسلمان کے حب الوطنی پر سوال اٹھاتا ہے تو دراصل وہ تاریخ سے ناواقف ہے یا جان بوجھ کر سچ کو مسخ کر رہا ہے۔ مسلمانوں کا کردار اس ملک کی آزادی میں بنیاد کا ہے اور بنیاد کو کمزور کر کے عمارت مضبوط نہیں رہ سکتی۔ جو قوم اپنی بنیاد کو فراموش کر دے، وہ خود اپنے زوال کو دعوت دیتی ہے۔ مسلمانوں نے کل بھی اس وطن کو غلامی سے نکالا تھا اور اگر آج ضرورت پڑی تو وہی کردار ادا کر کے اس وطن کو ہر ظالم اور جابر کے پنجے سے آزاد کرائیں گے، کیونکہ آزادی اور خودداری مسلمانوں کی میراث ہے اور وہ اس میراث کی حفاظت کرنا بخوبی جانتے ہیں۔ گرچہ مسلمانوں کی قربانیوں کو مٹانے اور ان کے کردار کو فراموش کرنے کی کوشش کی جارہی ہے، لیکن مسلمانوں کی تاریخ، جدوجہد اور خدمات ایسی روشن اور ناقابلِ فراموش حقیقت ہیں جو وقت کی گرد میں دب نہیں سکتیں، بلکہ آنے والی نسلوں کے لیے ہمیشہ حوصلہ، عزم اور آزادی کی جستجو کا چراغ بنی رہیں گی۔

جب پڑاوقت گلستاں پہ توخوں ہم نے دیا

جب بہارآئی تو کہتے ہیں ترا کام نہیں

فقط و السلام

بندہ محمّد فرقان عفی عنہ

12؍ اگست 2025ء بروز منگل

#IndependenceDay | #Azaadi | #FreedomFighters | #PaighameFurqan | #MTIH | #TIMS