پیام فرقان - 01

{ پیام فرقان - 01 }

🎯قلم کی اہمیت اور طاقت (آغاز تحریر)!

✍️بندہ محمّد فرقان عفی عنہ

(ڈائریکٹر مرکز تحفظ اسلام ہند)

اللہ تبارک و تعالیٰ نے بنی نوع انسان کو بے شمار نعمتوں سے نوازا ہے، جسکا ذکر قرآن مجید میں بار بار ملتا ہے۔ انہیں نعمتوں میں سے ”قلم“ اللہ تبارک و تعالیٰ کی ایک عظیم نعمت ہے۔ قلم کی اہمیت کسی سے مخفی نہیں ہے۔ اس نعمتِ خدا وندی کا تذکرہ قرآن مجید کی سب سے پہلی وحی میں بھی کیا گیا ہے۔ اللہ تعالیٰ نے فرمایا: ”اقْرَأْ بِاسْمِ رَبِّکَ الَّذِی خَلَقَ، خَلَقَ الْإِنسَانَ مِنْ عَلَقٍ، اقْرَأْ وَرَبُّکَ الْأَکْرَمُ، الَّذِی عَلَّمَ بِالْقَلَمِ، عَلَّمَ الْإِنسَانَ مَا لَمْ یَعْلَمْ“ کہ ”اے پیغمبر! اپنے رب کا نام لے کر پڑھا کیجیے، جو سب کا پیدا کرنے والا ہے، جس نے انسان کو خون کے لوتھڑے سے پیدا کیا، آپ قرآن پڑھا کیجیے اور آپ کا رب بڑا کریم ہے، جس نے قلم سے تعلیم دی، انسان کو ان چیزوں کی تعلیم دی جن کو وہ نہیں جانتا تھا۔“ (سورۃ العلق)۔ قرآن مجید کے نزدیک قلم و کتابت کی اہمیت کا ثبوت اس سے زیادہ اور کیا ہوسکتا ہے کہ قرآن مجید کی ایک سورۃ کو ”القلم“ کا نام دیا گیا ہے، اور اس سورۃ میں اللہ تعالیٰ نے قلم کی قسم اور ان چیزوں کی بھی قسم ذکر فرمائی جنہیں قلم لکھتا ہے۔ ارشاد خداوندی ہے: ”نٓ ۚ وَالْقَلَمِ وَمَا يَسْطُرُوْنَ“ کہ ”قسم ہے قلم کی اور اس کی جو وہ لکھتے ہیں۔“ (سورۃ القلم)۔ قلم وہ عظیم شئ ہے جس کے ذریعہ علوم کو تحفظ و بقاء فراہم ہوتا ہے۔ دین کی حفاظت اور ملت کے دینی، سیاسی، معاشی، معاشرتی اور اجتماعی امور کو سرانجام دینے کیلئے فن کتابت کی اشد ضرورت ہوتی ہے اور قرآن مجید کی بےشمار آیات اس کی اہمیت کی طرف اشارہ کرتی ہیں۔ یہی وجہ ہے کہ حضور صلی اللہ علیہ وسلم نے اپنی امت کو فن کتابت کے زیور سے آراستہ کرنے کیلئے خصوصی اہتمام فرمایا۔ قلم کا استعمال مثبت ومنفی دونوں طرح ہو سکتا ہے۔ اللہ تعالیٰ کی ایک عظیم الشان نعمت کی قدردانی اسی میں ہیکہ اسے خیر و بھلائی، دین و شریعت کی نشر و اشاعت کے کاموں میں استعمال کیا جائے۔ دور حاضر میں اہل علم کی ذمہ داری ہیکہ وہ قلم کے استعمال اور فن تحریر کو امر بالمعروف او رنہی عن المنکر کے کاموں میں استعمال کریں۔ کیونکہ قلم تلوار سے زیادہ طاقتور ہوتا ہے، جسکا کا استعمال وقت کی اہم ترین ضرورت ہے۔ اسی کو پیش نظر رکھتے ہوئے عاجز نے چند سال قبل ”پیغام فرقان“ کے نام سے طویل مضامین کا سلسلہ شروع کیا تھا، الحمدللہ ملک بھر کے مختلف اخبارات نے اس سلسلے کی قسطوں کو شائع کرتے ہوئے اسے زینت بخشی۔ اسی کے ساتھ اب ”پیام فرقان“ کے نام سے مضامین کا ایک نیا سلسلہ شروع کیا جارہا ہے۔ پیام فرقان کی سب سے بڑی خاصیت یہ ہوگی کہ یہ مختصر اور جامع ہوگا۔ امید ہیکہ آپ حضرات یہ منفرد سلسلے کو پسند فرمائیں گے۔ اللہ تعالیٰ سے دعا ہے کہ وہ ہمیں قلم کے صحیح استعمال کی توفیق عنایت عطا فرمائے اور فتنوں سے مامون و محفوظ فرمائے۔ آمین!

فقط و السلام

بندہ محمّد فرقان عفی عنہ

(ڈائریکٹر مرکز تحفظ اسلام ہند)

یکم جنوری 2021ء بروز جمعہ

+918495087865

mdfurqan7865@gmail.com

ortArticle