”یومِ صحابہؓ“: غیرتِ ایمانی کی تجدید کا دن!
اصحابِ رسول ﷺ وہ مقدس ہستیاں ہیں جنہوں نے اپنی جان، مال، خاندان، خواہشات اور پوری زندگی اللہ، رسول اور دینِ اسلام کے لیے قربان کر دی۔ ان کے اخلاص، استقامت، فداکاری اور نبی ﷺ سے بے مثال محبت کی گواہی خود قرآن نے دی: ”رَضِيَ ٱللَّهُ عَنْهُمْ وَرَضُوا۟ عَنْهُ“۔ وہی صحابہؓ جنہوں نے قرآن کو محفوظ کیا، حدیث کو روایت کیا، اسلام کو پوری دنیا تک پہنچایا، آج اُن کی شان میں زبان دراز کرنا، سوشل میڈیا پر اُن کی توہین کرنا اور اجتہادی اختلافات کو بنیاد بنا کر ان پر طعن کرنا نہایت افسوسناک، خطرناک اور درحقیقت ایمان سوز عمل ہے۔
دشمنانِ اسلام جانتے ہیں کہ اگر صحابہؓ کی عظمت دلوں سے نکال دی جائے تو دین کو مشکوک بنانا آسان ہو جائے گا۔ اسی لیے فتنہ پرور حلقے اہل بیتؓ کے نام پر دیگر صحابہؓ پر طعن کرتے ہیں، حالانکہ اہل بیتؓ خود دیگر صحابہؓ کی عزت کرتے تھے، ان کی امامت میں نماز پڑھتے اور ان کے ساتھ حسن سلوک کرتے۔ گستاخانِ صحابہ دراصل نبی ﷺ کے گستاخ ہیں، کیونکہ صحابہؓ ہی نبی ﷺ کی مجلس، جنگ، قربانی اور امانت کے وارث تھے۔
آج *”یومِ صحابہؓ“* اس عہد کی تجدید کا دن ہے کہ ہم اُن مقدس ہستیوں کے دفاع میں کسی ملامت گر کی ملامت کی پروا نہیں کریں گے۔ کیونکہ امتِ مسلمہ کی خاموشی، بے حسی اور غیرت کا فقدان اس بات کا ثبوت ہے کہ ہم ایمان کے قلعے سے دور ہو چکے ہیں۔ اگر آج ہم نے صحابہؓ کے دفاع میں زبان نہ کھولی، نسلوں کو ان کی سیرت نہ سنائی، گستاخوں کو جواب نہ دیا، تو آنے والی نسلیں ہمیں معاف نہیں کریں گی اور قیامت کے دن ہمیں نبی ﷺ اور اُن کے یاروں کے سامنے جواب دینا ہوگا۔
*یاد رکھو! دفاعِ صحابہ ایمان کی علامت ہے، غیرت کا تقاضا ہے اور امت کے مستقبل کا تحفظ ہے۔*
لہٰذا اُٹھو، جاگو، اور *”یومِ صحابہؓ“* مبارک موقع پر صحابہؓ کے عشق کا پرچم تھام کر باطل کو للکار دو! ان شاء اللہ دنیا بھی سنورے گی، اور آخرت بھی۔
ہم اصحابِ نبیؐ کے خادم ان کے نوکر ہیں
یہ نسبت ہے ہماری، یہ فخر کا جوہر ہے
اگر کوئی کرے توہین یاروں کی نبیؐ کے
تو پھر ہمارا ہر لفظ شمشیرِ جوہر ہے
فقط و السلام
بندہ محمّد فرقان عفی عنہ
(ڈائریکٹر مرکز تحفظ اسلام ہند)
18 جولائی 2025ء بروز جمعہ
بموقع : ”یومِ صحابہؓ“
#Sahaba | #YaumeSahaba | #AzmateSahaba |#DifaeSahaba | #NamooseSahaba | #Newspaper | #News | #NamooseSahaba | #MTIH | #TIMS
No comments:
Post a Comment