Aqaid-e-Islam

 عقائد اسلام | Aqaid-e-Islam | अकाइद-ए-इस्लाम

عقائد کے خلاف فتنوں کی کثرت مرض کی علامت ہے!

عقائد کے خلاف فتنوں کی کثرت مرض کی علامت ہے! 

از قلم : حضرت مولانا مولانا شاہ عالم گورکھپوری صاحب دامت برکاتہم

(نائب ناظم کل ہند مجلس تحفظ ختم نبوت، دارالعلوم دیوبند)

اسلام میں عقیدہ کو اوّلیت حاصل ہے پہلے خدا اور اس کے بھیجے ہوئے رسولوں اور کتابوں پر درست عقیدہ رکھنا ضروری ہوتا ہے پھر اس کے بعد ہی اعمال کی ابتدا ہوتی ہے ، تفسیر حدیث اور فقہ وغیرہ کی ضرورت بھی اسی شخص کو پڑے گی جس کا پہلے خدا ، اس کے رسول اور خدا کی کتابوں پر ایمان ہوگا ورنہ احادیث،تفسیر اور فقہ وغیرہ علوم اسلامیہ کو ماننا ایسا ہی بے سودہوگا جیسے کہ بغیر بنیاد کے عمارت کھڑی کردی جائے ۔عقیدہ کی حیثیت اور اہمیت کسی پر پوشیدہ نہیں مگر حیرت اس بات پر ہے کہ عقائد کی حفاظت کے لیے جو محنت درکار ہے اس میں مجموعی طورپر حد درجہ تغافل سے کام لیا جارہا ہے ۔ مدارس اسلامیہ میں داخل عقائد کے نصاب پر اور ان کی تعلیم اور انداز تعلیم و تعلم پر اگر منصفانہ نظر ڈالی جائے تو معلوم یہ ہوتا ہے عقائد کے باب میں وہ محنت نہیں کی جاتی جودیگر ابواب میں دور حاضر کے تقاضوں کی تکمیل کے لیے کی جاتی ہے ۔

ماضی میں اسلامی عقائد پر جب یونانی فلسفہ نے یلغار مچایا تو اس کے فریب کو توڑنے کے لیے ہمارے بڑوں نے اس طرح محنتیں کیں کہ یونانی فلسفہ کی جادوگری آج خود فلسفیوں کے لیے مضحکہ خیز بن کر رہ گئی ہے ،متکلمین اسلام کے وضع کردہ اصولوں نے فلسفہ کے راستے سے آنے والے ارتدادی سیلاب کو نہ صرف یہ کہ قیامت تک کے لیے بند کردیا بلکہ نازک خیال فلسفیوں کو بھی ہمیشہ کے لیے خاموش کردیا۔ لیکن آج صورت حال یوں بدل گئی ہے کہ جگہ جگہ فتنوں کی کثرت ہورہی ہے ، نئے نئے ارتدادی فتنے مسلمانوں کے درمیان جنم لے رہے اور پنپ رہے ہیں ،قدیم فلسفیوں کے زہریلے اثرات کو نئی نئی تعبیرات و زبان میں پیش کرکے ایک بار پھر اسلامی عقائد کو مسخ کرنے کی فکر میں بیشمار تنظیمیں شب و روز مصروف ہیں، اعمال میں تو خود مسلمانوں نے ہی دین کو بغیر ماہرینِ دین کے چلانے کی وکالت شروع کررکھی ہے لیکن پانی سر سے اتنا اونچا ہوچکا ہے کہ عقائد میں بھی اب دین کو بغیر ماہرینِ دین کے چلانے کی وبا عام مسلمانوں میں پھیلنے لگی ہے ،ہر دانشوراسلامی عقائد میں رائے زنی کرنااپنا موروثی حق سمجھنے لگا ہے ۔ پھر ملحددانشوروں کی تلچھٹ مرزا قادیانی اوراُس جیسے دیگر لوگ جیسے شکیل بن حنیف یا راشد شاز#وغیرہ ،اپنے آپ کو کیوں پیچھے رکھیں؛چناں چہ وہ بھی مسلمانوں کے درمیان عقائد کی مضبوط تعلیم نہ ہونے کا جی بھرکے فائدہ اٹھارہے ہیں ۔ظاہر سی بات ہے کہ اس خودسری کا بھیانک نتیجہ ؛ عقائد اسلامیہ کو بازیچہٴ اطفال بنانے کی صورت میں نکلے گا،جیسا کہ عام طور پر اب دیکھنے میں بھی آرہا ہے کہ جگہ جگہ اسلام کے قطعی اور یقینی عقائد و نظریات کو تختہٴ مشق بنایا جانے لگا ہے ۔ میدان میں بالکل خاموشی کی بات تو نہیں کی جاسکتی لیکن سوائے چند افراد اور دو ایک تنظیموں کے کتنے لوگ ہیں جو اس سیلاب بلاکو روکنے میں فکر مند ہیں ؟۔

فکر مندوں کا بھی حال یہ ہے کہ مرض کی بجائے علامات مرض کے علاج میں لگے ہیں جبکہ فتنوں کی کثرت اِس مرض کی علامت ہے کہ مسلمانوں کا عقیدہ کمزور ہوچکا ہے اُسے مضبوط کیاجائے تاکہ فتنوں سے بچاوٴ میں مسلمان خود اپنی طاقت استعمال کرسکیں ۔ علاج کا کامیاب طریقہ یہ ہے کہ مرض کو دُور کیا جائے اور براہ راست مرض کا علاج کیا جائے نہ کہ علامتوں کا ۔لیکن آج کل فتنوں کے پیچھے طرح طرح کی تنظیمیں قائم ہورہی ہیں علامات مرض کے پیچھے دوڑ لگانے والے کچھ لوگ دکھائی دیتے ہیں لیکن اصل مرض کے ازالے کی جانب توجہ کتنے لوگوں کی ہے ؟ ۔

بلاشبہ اس میدان میں کام کرنے والی تنظیموں پر بھی کچھ ذمہ داریاں عائدہوتی ہیں جن کے نبھانے میں وہ کوتاہ عمل ہیں لیکن مسئلے کا حل ؛کسی کو مورد الزام ٹھہرانے میں نہیں بلکہ اس بات میں ہے کہ ایمان و عقائد کے خلاف اٹھنے والے فتنوں کے سد باب کے لیے عقائد اور علم کلام کی تعلیم کے لیے محنت میں کچھ اضافہ کیا جائے اور علم کلام کی تعلیم کو نہ صرف یہ کہ معقولیت و معنویت کے ساتھ اپنے اپنے مکاتب ومدارس کے نصاب کا جزو بنایا جائے بلکہ عام فہم بیانات اورکتابوں کے ذریعہ مساجد کی صبح و شام کی تعلیم کا حصہ بنادیا جائے ۔متکلمین اسلام نے عقائد کو تحفظ فراہم کرنے کے لیے جوکامیاب و لاجواب علمی اور عقلی اصول دئیے ہیں، اُن کی روشنی میں حالات حاضرہ کو ملحوظ رکھتے ہوئے علاقائی اور رائج زبان و بیان کے ذریعہ عام مسلمانوں میں بھی اتنی صلاحیت پیدا کردی جائے کہ گلی کوچوں میں جنم لینے والی ارتدادی لہروں کا مسکت جواب دینے کی صلاحیت اُن میں پیدا ہوجائے ۔

علم کلام جوعقائد کو تحفظ فراہم کرتا ہے اس سے بیگانگی اور ناواقفیت کے سبب آج کا مسلمان اس قدر مرعوب ہوگیا ہے کہ اگر کوئی قادیانی یا شکیلی کسی گلی کوچے میں وسوسہ چھوڑدے تو ہمارا نوجوان اس کو بہت بڑا تیر سمجھ کر مولانا صاحبوں کے پیچھے پڑجائے گا کہ اس کا جواب کیا ہے؟ لیکن کوئی عالم دین مسجد کے ممبر و محراب سے معقول سے معقول ترجواب دے دے تو اس کو لے کر قادیانیوں یا شکیلیوں کے پیچھے کبھی نہیں پڑتا کہ تم نے بلاوجہ کا یہ وسوسہ اسلام میں کیوں پیداکیا ؟۔ مسلمانوں کے درمیان مرعوبیت کی اس حالت کو اگر پلٹنا ہے تو اس کے لیے معقول توڑ دریافت کرنا پڑے گا ۔راقم سطور نے اپنے بڑوں کی تحریرات و بیانات کی روشنی میں اس کا جو حل سمجھا ہے وہ یہ ہے کہ دور حاضر کی زبان میں علم کلام کے دلائل سے مسلمانوں کو مزین کردیا جائے ۔ اگر اس باب میں بچپن کی تعلیم مضبوط ہوجائے تو عمر کے ہرمرحلے میں اُن دلائل سے وہ بھر پور فائدہ اٹھائیں گے اورقدیم علم کلام کو اپنی من پسندجدید زبان میں پا کر ہر دہریے اور ملحدکا توڑ ؛وہ خود دریافت کریں گے ،بلکہ اسلامی عقائد کے روشن ماضی سے خود کو مربوط رکھنے کی ذمہ داری کو بھی وہ محسوس کریں گے ۔

قدیم متکلمین اسلام کے مضامین کو جدید اور سہل زبان میں بیان کرنے یا سمجھنے کے لیے ،حضرت مولانا اشرف علی تھانوی ؒ، حضرت مولانا شبیر احمد عثمانی ؒ، حضرت مولانا محمد ادریس کاندھلوی ؒ، حضرت مولانا بدر عالم میرٹھی ؒ، حضرت مولانا محمد مسلم دیوبندی ؒ، اسی طرح حضرت مولانا محمد میاں صاحب ؒ وغیرہ اکابر دیوبند کے رسائل و مضامین جو بطور خاص عقائد اور کلام کے ہی موضوع پر تصنیف کیے گئے ہیں؛ شائقین اور دلچسپی رکھنے والوں کے لیے نفع بخش ہوسکتے ہیں۔ یا ان بزرگوں کی تحریرات کی روشنی میں اپنے اپنے علاقوں میں پیش آمدہ مخالفین اسلام کے اعتراضات و وساوس کے جوابات؛ نئی نئی مثالوں کے ذریعہ ششتہ و سلیس زبان میں ترتیب بھی دیئے جاسکتے ہیں۔

پیشکش : سلسلہ عقائد اسلام، شعبۂ تحفظ اسلام میڈیا سروس، مرکز تحفظ اسلام ہند

عقیدہٴ توحید کی عظمت واہمیت!

 عقیدہٴ توحید کی عظمت واہمیت! 

از قلم : حضرت مولانا یرید احمد نعمانی مدظلہ

          یَا أَیُّھَا النَّاسُ اعْبُدُواْ رَبَّکُمُ الَّذِیْ خَلَقَکُمْ وَالَّذِیْنَ مِن قَبْلِکُمْ لَعَلَّکُمْ تَتَّقُونَ(21) الَّذِیْ جَعَلَ لَکُمُ الأَرْضَ فِرَاشاً وَالسَّمَاء بِنَاءً وَأَنزَلَ مِنَ السَّمَاءِ مَاءً فَأَخْرَجَ بِہِ مِنَ الثَّمَرَاتِ رِزْقاً لَّکُمْ فَلاَ تَجْعَلُواْ لِلہِ أَندَاداً وَأَنتُمْ تَعْلَمُونَ (22)…(سورةالبقرة)

          ترجمہ: ”اے لوگو! اپنے اس پرودگار کی عبادت کرو جس نے تمہیں اور ان لوگوں کو پیدا کیا جوتم سے پہلے گزرے ہیں؛ تاکہ تم متقی بن جاؤ(21)(وہ پرودگار) جس نے تمہارے لیے زمین کو بچھونا بنایااور آسمان کو چھت، اور آسمان سے پانی برسایا،پھر اس کے ذریعے تمہارے رزق کے طور پر پھل نکالے۔ لہٰذا اللہ کے ساتھ شریک نہ ٹہراؤ؛جب کہ تم ( یہ سب باتیں) جانتے ہو۔(22)“ (آسان ترجمہٴ قرآن)

تشریح وتوضیح:

          قرآن کریم سرچشمہٴ ہدایت ہے۔یہ اللہ رب العالمین کی وہ آخری الہامی کتاب ہے،جو اس نے اپنے آخری نبی جناب نبی کریم صلی اللہ علیہ وسلم پر اتاری۔ یہ قیامت تک آنے والے تمام انسانوں کو فلاح،نجات اورسعادت کاراستہ دکھاتی رہے گی۔اس کلام مبین سے کون فائدہ اٹھاتا ہے اورکون انکارکرکے اپنے لیے ابدی شقاوت کا سامان اکٹھا کرتاہے؟ اس کا جواب سورت بقرہ کی ابتدائی آیات سے ہی مل جاتاہے۔جن میں رب کریم نے انسانوں کے تین طبقات کا ذکر فرمایا ہے:

          ۱۔مومنین          ۲۔کافرین           ۳۔ منافقین

          ابتدائے سورت میں ہر ایک کی الگ الگ صفات بیان فرمانے کے بعد، تمام انسانوں کو ”یا ایھا الناس“ سے مخاطب کیا گیاہے۔ اس خطاب میں مومن مخلص بھی داخل ہے اور کافر ومنافق بھی۔ قرآن مجید میں یہ پہلا خطاب ہے،جس میں اللہ رب العالمین پوری انسانیت کو کسی لحاظ وامتیاز کے بغیر اپنی ذات عالی کی طرف متوجہ فرمارہے ہیں اور بندوں کو اپنی قدرتِ کاملہ اور الوہیتِ مطلقہ سے آگاہ کرنے کے لیے ”آفاقی اور انفسی نعمتوں“ کا تذکرہ فرمارہے ہیں۔

          یعنی کچھ نعمتیں تو وہ ہیں جو براہ راست انسان کی اپنی ذات سے متعلق ہیں۔ بعضے ایسی ہیں جن کا تعلق انسان کے اردگرد پائی جانے والی چیزوں سے ہے۔ انسان پر اللہ تعالیٰ کی سب سے بڑی نعمت، خود اس کا وجود ہے۔ مفتی اعظم پاکستان حضرت مولانا مفتی محمد شفیع عثمانی نور اللہ مرقدہ اس حوالے سے لکھتے ہیں:”نیست سے ہست اور نابود سے بودکرنا، پھر بطن مادر کی تاریکیوں اور گندگیوں میں ایسا حسین وجمیل ،پاک وصاف انسان بنا دینا کہ فرشتے بھی اس کی پاکی پر رشک کریں،یہ سوائے اُ س ذات حق کے کس کا کام ہوسکتاہے،جو کسی کا محتاج نہیں اور سب اس کے محتاج ہیں۔“(معارف القرآن:133/1)

          جب کہ آفاقی نعمتوں میں چار چیزوں کا ذکر فرمایا ہے:

          ۱۔       زمین               ۲۔       آسمان

          ۳۔      بارش              ۴۔      زمین سے غلہ اگنا

          ان چاروں نعمتوں کے خالق ومالک بھی صرف اورصرف اللہ رب العالمین ہیں۔ قرآن کریم میں کئی مقامات پر ان کی تخلیق وپیدائش کا مفصل ذکر کیا گیاہے۔ غرض! انسان کو حاصل تمام نعمتیں خواہ ان کا تعلق ا س کی ذات سے ہو یا نہ ہو ،اللہ تعالیٰ کی عطافرمودہ ہیں۔اوربندگی والوہیت کا مستحق بھی صرف وہی ہے۔

          شیخ الاسلام مفتی محمد تقی عثمانی زید مجدہم آیاتِ بالا کی تشریح یوں بیان کرتے ہیں:”ان دوآیتوں میں اسلام کے بنیادی عقیدئہ توحید کی دعوت دی گئی ہے۔ اور مختصر انداز میں اس کی دلیل بھی بیان کردی گئی ہے۔ اہل عرب یہ مانتے تھے کہ ساری کائنات کو پیدا کرنا، زمین وآسمان کی تخلیق اور آسمان سے بارش برسانا،او راس سے پیداوار اگانا،یہ سب کام اللہ تعالیٰ کے ہیں۔ اس کے باوجود وہ یہ عقیدہ رکھتے تھے کہ اللہ تعالیٰ نے بہت سے کام بتوں کے سپرد کررکھے ہیں۔ اوروہ بت اپنے اپنے کاموں میں براہ راست فیصلہ کرنے کی صلاحیت رکھتے ہیں۔ لہٰذا وہ ان بتوں کی عبادت اس لیے کرتے تھے کہ وہ ان کی مدد کریں۔ اللہ تعالیٰ نے فرمایا کہ جب ہر چیزکے پیدا کرنے والے ہم ہیں اور ہمیں کائنات چلانے کے لیے کسی کی مدد کی ضرورت نہیں، تو عبادت کسی اور کی کرنا کتنے بڑے ظلم کی بات ہے۔“(آسان ترجمہ قرآن: 49/1)

آیات صلی اللہ علیہ وسلم حدیث نبوی کے آئینے میں

          یہی وجہ ہے کہ جب اللہ کے پیارے نبی علیہ السلام سے سوال کیا گیا کہ کون سا گنا ہ اللہ کے ہاں بڑاہے؟تو آپ علیہ السلام نے جواب میں ارشاد فرمایا:”تم اللہ کے ساتھ کسی کو شریک ٹہراؤ(ذات میں یا صفات میں) حالاں کہ اسی نے تمہیں تن تنہا پیدا کیا ہے۔“(تفسیر ابن کثیر بحوالہ صحیحین:80/1)

          ایک دوسری حدیث مبارکہ میں ارشاد فرمایاگیا:”اے معاذ!کیا تم جانتے ہو کہ بندوں پر اللہ کا کیا حق ہے؟(پھر ارشاد فرمایا بندوں پر اللہ کا یہ حق ہے کہ ) اسی کی عبادت کریں اور کسی چیز کو اس کے ساتھ شریک نہ ٹہرائیں۔“(حوالہ بالا)

          شریعت مطہرہ میں عقیدہٴ توحید کی حفاظت کا کس قدر حکم دیاگیاہے؟اس کا اندازہ اس بات سے لگایا جاسکتاہے کہ جن الفاظ سے شرک کا معمولی شائبہ بھی پیدا ہوسکتاہو، شارع علیہ السلام نے امت کو اس سے اجتناب کا حکم فرمایاہے۔ اس سلسلے میں طفیل رضی اللہ عنہ ،جو ام المومنین عائشہ صدیقہ رضی اللہ عنھا کے ماں شریک بھائی بھی ہیں،کا واقعہ لائق مطالعہ ہے۔

          وہ فرماتے ہیں: ”ایک دن میں نے خواب دیکھا کہ میں یہود کی ایک جماعت کے پاس سے گزررہاہوں۔میں نے ان سے دریافت کیا کہ تم کون ہو؟ انہوں نے جواب دیا کہ ہم یہودی ہیں۔ میں نے یہ سن کر کہا:”تم وہی قوم ہو جس نے عزیر ابن اللہ ( کامشرکانہ جملہ) کہاتھا۔“ جواب میں وہ کہنے لگے :”تم لوگ بھی ایسی (شرک سے مشابہ باتیں) منہ سے نکالتے ہو کہ ماشاء اللہ وماشاء محمد (جو اللہ چاہے اور جومحمد چاہے) کہتے ہو۔“طفیل کہتے ہیں کہ اس کے بعد میرا گزر عیسائیوں کی ایک جماعت پر ہوا۔ان سے بھی یہی دریافت کیا۔ انہوں نے کہا ہم عیسائی ہیں۔میں نے کہا تم وہی قوم ہو جس نے المسیح ابن اللہ ( کا مشرکانہ جملہ) کہا تھا۔جواب میں انہوں نے بھی یہود والی بات دہرائی۔“

          حضرت طفیل کہتے ہیں کہ صبح ہوئی تو جس کو اس بارے میں خبر دے سکتاتھا،دے دی ۔پھر اللہ کے پیارے نبی علیہ اسلام کی خدمت میں حاضری دی اورساراماجرا کہہ سنایا۔

          آپ علیہ السلام نے دریافت فرمایا:”کیا آپ نے اس بارے میں کسی اورکو بھی خبردی ہے؟“ میں نے اثبات میں جواب دیا۔آپ علیہ السلام نے کھڑے ہوکر خطبہ کے بعد ارشاد فرمایا: ”طفیل نے ایک خواب دیکھا ہے۔ وہ جس جس کو تم میں سے خبر دے سکا، دے دی۔ یادرکھو!تم لوگ ایک ایسا کلمہ کہتے رہے ہو ،جس کے روکنے سے مجھے اب تک رکاوٹ تھی۔بس( آج کے بعد) تم لوگ”ماشاء اللہ وشاء محمد“ کا جملہ نہ کہو بلکہ (اس کی جگہ) صرف ماشاء اللہ کہو۔“(بن کثیر:80/1)

نکات ومعارف

۱ .......”یا ایھاالناس“

          مذکورہ جملے کا اردومیں ترجمہ کیا جائے تو مطلب ہوگا:”اے انسانو“۔اس کی لغوی تحقیق وتشریح کے بعدامام عبداللہ بن احمد نسفی اس طرز خطاب کی اہمیت پر روشنی ڈالتے ہوئے لکھتے ہیں: ”قرآن مجید میں اکثر مقامات پر اس طرح کا خطاب لایاگیاہے۔ وجہ ا س کی یہ ہے کہ اللہ تعالیٰ اپنے بندوں کو جن اوامرونواہی،وعدووعید کا مخاطب بناتے ہیں وہ اپنی جگہ عظیم الشان ہیں۔لہٰذا بندوں کے لیے ضروری ہے کہ وہ غفلت سے نکل کر کامل بیداری اورقلبی میلان کے ساتھ ان ندآتِ ربانیہ کی طرف متوجہ ہوں۔ یہی سبب ہے کہ اس طرزِ تخاطب کو عربی زبان کے اعتبار سے بہت زیادہ مُوکَّد بنایاگیاہے۔“(مدارک:32/1)

۲…”عبادت “کا مفہوم ومطلب:

          عبادت کے معنی اپنی پوری طاقت مکمل فرماں برداری میں صرف کرنا اور خوف وعظمت کے پیش نظر نافرمانی سے دور رہنا۔(معارف القران بحوالہ روح البیان:132/1)

          اسی بات کو حکیم الامت مجدد الملت حضرت مولانا اشرف علی تھانوی قد س سرہ نے اپنے ایک ملفوظ میں یوں بیان فرمایا ہے:”اگر انسان میں عبدیت پیدا ہوجائے تو وہ انسان ہے ورنہ حیوان سے بھی بدتر ہے۔ انسانیت حقیقی یہی ہے کہ عبدیت ہو،فناہو، افتقارہو، انکسار ہو، عجز ہو؛ کیوں کہ یہ سب علامات ہیں عبد کامل کی۔ اسی عبدیت کی بدولت ہر وقت انسان کے اندر ایک حتیاج کی سی کیفیت غالب رہتی ہے،جو عین مقصود اورمطلوب ہے۔“(ملفوظات حکیم الامت: 141/4)

۳… وجود باری تعالیٰ پر چند اقوال:

          امام شافعی رحمہ اللہ سے پوچھا گیا:” اس کائنات کو بنانے والا کوئی ہے؟“ انہوں نے جو اب میں فرمایا :” شہتوت کا پتہ جس کا ذائقہ ایک ہے؛لیکن اگرریشم کا کیڑا اسے کھائے تو اس سے ریشم نکلتاہے۔اگر شہد کی مکھی کھائے تواس سے شہد نکلتاہے۔اگرگائے، بکری اوردیگر چوپائے اس اپنے پیٹ میں ڈالیں تو یہ گوبر اورمینگنی کی صور ت میں باہر نکلتاہے۔ہرن کھالے تو مشک نکلتاہے؛حالاں کہ چیز ایک ہی ہے؛مگرصورتیں مختلف بن رہی ہیں۔“( یہ مختلف نتائج ایک شئی سے کس طرح برآمد ہورہے ہیں)

          کسی عرب بدو سے جب خداتعالیٰ کے وجود پر دلیل پوچھی گئی تو اس نے کہا:”سبحان اللہ! جب اونٹ کی مینگنی اس پر دلالت کرتی کہ یہاں سے اونٹ گزراہے۔کسی مسافر کے نقش قدم سے یہ معلوم ہوجاتاہے کہ اس راستے سے اس کا گزرہواہے۔ تو پھر یہ آسمان جو ستاروں سے چمک دمک رہاہے۔یہ زمین جو راستوں سے سجی ہوئی ہے اور یہ سمندر جو لہروں کے ساتھ جوش ماررہاہے، کیا کسی ایسی ہستی کے ثبوت ووجود پر دلالت نہیں کرتا جو خوب باخبر بھی ہے اور تمام چیزوں کے حقائق واسرار سے واقف بھی؟“

ابن المعتزشاعر کہتاہے          #

فَیَا عَجَباً کیفَ یُعْصَیٰ الْالٰہ       اَمْ کیفَ یَجْحَدُہ الجاحِد

وَفِیْ کُلِّ شئیٍ لَہ ایة      تَدُلُّ علی أنَّہ وَاحِد

          ترجمہ: تعجب ہے کہ اللہ تعالیٰ کی نافرمانی کیسے کی جاسکتی ہے یا اس کے وجود سے کوئی کیسے منکرہوسکتاہے ؟جب کہ ہر چیز میں اس کے وجود کی نشانی اور دلیل موجود ہے۔جو بہ زبان حال پکار پکار کر گواہی دے رہی ہے کہ وہ اکیلا ویکتاہے اس کا کوئی شریک وسہیم نہیں۔(ابن کثیر:82/1)

۴…”انداد“ کسے کہتے ہیں؟

          علامہ ابن کثیر لکھتے ہیں :”انداد وہ شرک ہے ،جو اندھیری رات میں سیاہ پتھر کے اوپر چیونٹی کے رینگنے سے بھی زیادہ پوشیدہ اورمخفی ہے۔اس کی مثال یوں سمجھی جاسکتی ہے کہ کوئی یوں کہے: ”اللہ کی قسم اور تمہاری زندگی کی قسم!“ یا کوئی یوں بولے:”اگر یہ کتا ہماری چوکیداری نہ کررہا ہوتا تو رات گھر میں چور آجاتے “ اسی طرح کوئی انسان اپنے دوست سے یہ کہے کہ ”جو اللہ چاہے اور تم چاہو“ یہ تمام کے تمام الفاظ اور جملے اللہ تعالیٰ کے ساتھ شرک ہے۔ ایک حدیث مبارکہ میں ہے کہ ایک صحابی رسول نے یوں کہا:”جو اللہ چاہے اور آپ چاہیں“یہ سن کر آپ علیہ السلام نے ارشاد فرمایا:”کیا تم مجھے اللہ کا شریک ٹہرارہے ہو؟“(ابن کثیر:81/1)

حاصل کلام

          مفتی اعظم پاکستان حضرت مفتی محمد شفیع عثمانی نوراللہ مرقدہ اپنی شہرہ آفاق تفسیر ”معارف القرآن“ میں آیات بالا کا خلاصہ یوں ذکر کرتے ہیں:”عقیدہٴ توحید جو اسلام کا سب سے پہلا بنیادی عقیدہ ہے،یہ صرف ایک نظریہ نہیں؛ بلکہ انسان کو صحیح معنی میں انسان بنانے کا واحد ذریعہ ہے۔ جو انسان کی تمام مشکلات کا حل،اورہر حالت میں اس کے لیے پناہ گاہ اورہرغم وفکر میں اس کا غم گسار ہے۔ کیوں کہ عقیدہ توحید کا حاصل یہ ہے کہ عناصر کے کون وفساد اوران کے سارے تغیرات صرف ایک ہستی کی مشیت کے تابع اور اس کی حکمت کے مظاہر ہیں۔ اورظاہر ہے کہ جب یہ عقیدہ کسی کے قلب ودماغ پر چھا جائے اور اس کا حال بن جائے تو یہ دنیا ہی اس کے لیے جنت بن جائے گی۔ سارے جھگڑے فساد اور ہر فساد کی بنیادیں ہی منہدم ہوجائیں گی۔ اس عقیدہ کا مالک ساری دنیا سے بے نیاز، ہر خوف وخطر سے بالاتر زندگی گزارتاہے؛ مگر ظاہر ہے کہ توحید محض کازبانی اقرار اس کے لیے کافی نہیں؛ بلکہ سچے دل سے اس کا یقین اور استحضار ضروری ہے؛ کیوں کہ توحید خدا․․․․․

واحد دیدن بود، نہ واحد گفتن

          کلمہ لا الہ الا اللہ کے پڑھنے والے توآج دنیا میں کروڑوں ہیں اوراتنے ہیں کہ کسی زمانے میں اتنے نہیں ہوئے؛ لیکن عام طور پر یہ صرف زبانی جمع خرچ ہے۔توحید کا رنگ ان میں رچا نہیں ورنہ ان کا بھی وہی حال ہوتا جو پہلے بزرگوں کا تھا کہ نہ کوئی بڑی سے بڑی قوت وطاقت ان کو مرعوب کرسکتی تھی اور نہ کسی قوم کی عددی اکثریت ان پر اثر انداز ہوسکتی تھی۔نہ کوئی بڑی سے بڑی دولت وسلطنت ان کے قلوب کو خلاف حق اپنی طرف جھکا سکتی تھی۔ ایک پیغمبر کھڑا ہوکر ساری دنیا کو للکار کر کہہ دیتاتھا کہ تم میرا کچھ نہیں بگاڑ سکتے۔”کیدون فلا تنظرون“ انبیا کے بعد صحابہ وتابعین جو تھوڑی مدت میں دنیا پر چھاگئے، ان کی طاقت وقوت اسی حقیقی توحید میں مضمر تھی۔ اللہ تعالیٰ ہمیں اور سب مسلمانوں کو یہ دولت نصیب فرمائیں۔“(معارف القرآن :139/1) 

------------------------------------------

(ماخوذ : ماہنامہ دارالعلوم ‏، شمارہ 9 - 10 ‏، جلد: 97 ‏، ذیقعدہ – ذی الحجہ 1434 ہجری مطابق ستمبر – اکتوبر 2013ء) 

پیشکش : سلسلہ عقائد اسلام، شعبۂ تحفظ اسلام میڈیا سروس، مرکز تحفظ اسلام ہند

Aqaid-e-Islam

عقائد اسلام | Aqaid-e-Islam | अकाइद-ए-इस्लाम

انسانی زندگی میں عقائد کی اہمیت!

 انسانی زندگی میں عقائد کی اہمیت! 

از قلم : حضرت مولانا مفتی محمد مسعود عزیزی ندوی مدظلہ

عقیدہ کی مثال:

محترم دینی بھائیو! آج کی اس مجلس میں ہمیں عقیدہ سے متعلق گفتگو کرنی ہے، اللہ تعالی عقیدہ کو سمجھنے پھر صحیح عقیدہ اختیار کرنے کی توفیق عطا فرمائے ۔

میرے عزیزو! انسانی زندگی میں عقیدہ کی جو اہمیت ہے ، اس کی مثال اس طرح ہے جس طرح کسی بھی عمارت میں بنیاد کی ، یعنی اگر بنیاد صحیح ، درست اور مضبوط ہوگی تو اس پر تعمیر ہونے والی ہر عمارت مضبوط اور دیر پا ہوگی، اوراگر بنیاد میں کسی قسم کی کمی ہوگی یا بنیاد صحیح مٹیریل (Material)صحیح مال لگا کر اور اچھے اندازپر نہیں رکھی جائے گی، تو اس پر تعمیر ہونے والی ہر عمارت بے کار، بے سود ، بے فائدہ او رکمزور ہو گی اوراس کے بھیانک نتائج جلد آشکارا ہوجائیں گے ۔

دوستو! بالکل اسی طرح اپنی ز ندگی کی بنیاد کو سمجھو! اگر ہماری زندگی کی بنیاد صحیح عقائد اور صحیح اصول پر قائم ہوگی تو ہماری زندگی میں ہونے والا ہر عمل چاہے وہ چھوٹا ہو یا بڑا، نتیجہ کے اعتبار سے بڑا سود مند، فائدہ مند، باثمر، مضبوط اور اللہ تعالی کے یہاں مقبول او رمبرور ہوگا ، اس لئے آج آپ اس نکتے کو سمجھ لوکہ یہ کیسی بیش بہا اور قیمتی چیز ہے ۔

عقیدہ کسے کہتے ہیں؟

میرے بھائیو! عقیدہ کہتے ہیں کسی بات کا یقین دل میں جمانا اور اس کو خدا کا حکم سمجھنا اور پھر اس کے مطابق عمل کرنا ، اسی لیے فاران کی چوٹی پر نبی برحق حضرت محمدمصطفی صلی اللہ علیہ وسلم نے مکے کے لوگوں کو اکٹھا کرکے جو پہلی آواز لگائی تھی وہ تھی:’’قُوْلُوْا لاَاِلَہَ اِلاَّاللّٰہُ تُفْلِحُوْا‘‘(۱) کہ اے لوگو! اللہ کو ایک مانو، کامیابی تمہارے قدم چومے گی ، اس میں سب سے پہلے اسی عقیدہ کی دعوت دی گئی ہے ، جس پر انسان کی زندگی کی عمارت تعمیر ہوسکتی ہے ۔

عقیدہ کا اجمال:

دوستو! عقیدہ کا اجمال یہ ہے :’’ آمَنْتُ بِاللّٰہِ کَمَا ہُوَ بِاَسْمَآئِہٖ وَصِفَاتِہٖ وَقَبِلْتُ جَمِیْعَ اَحْکَامِہٖ، اِقْرَارٌ بِاللِّسَانِ وَتَصْدِیْقٌ بِالْقَلْبِ‘‘ کہ ایمان لایا میں اللہ پر ، جیسا کہ وہ اپنے ناموں اوراپنی صفات کے متصف ساتھ ہے ،اور میں نے اس کے تمام احکام کو قبول کیا، اوراس بات کا میں زبان سے اقرار کرتاہوں اور دل سے تصدیق کرتاہوں ۔

عقیدہ کی تفصیل:

تفصیلی طورپر اس کو اس طرح سمجھا جاسکتاہے :’’آمَنْتُ بِاللّٰہِ وَمَلاَئِکَتِہٖ وَکُتُبِہٖ وُرُسُلِہٖ وَالْیَوْمِ الآخِرِ وَالْقَدْرِ خَیْرِہٖ وَشَرِّہِ مِنَ اللّٰہِ تَعَالَی وَالْبَعَثِ بَعْدَالْمَوْتِ‘‘ یعنی ایمان لایا میں اللہ پر ، او راس کے فرشتوں پر اور اس کی کتابوں پر اوراس کے رسولوں پر اور آخرت کے دن پر اور ہر اچھی بری تقدیر پر کہ یہ سب کچھ اللہ تعالی کی طرف سے ہے اور مرنے کے بعد جی اٹھنے پر ۔

تین بنیادی عقائد:

اسلام کے تین بنیادی عقائد ہیں :

(۱) توحید کا عقیدہ

(۲) رسالت کا عقیدہ

(۳) آخرت کا عقیدہ

پہلا عقید ہ توحید کاہے کہ ہمارا پروردگار اللہ ہے ، جس نے اس کا ئنات کو پیدا کیا ، اس کی ذات وصفات میں کوئی شریک نہیں ، وہ وحدہ لاشریک ہے ، اکیلا ہے ۔

دوسرا عقیدہ رسالت کا ہے کہ حضرت محمدمصطفی صلی اللہ علیہ وسلم اللہ کے آخری رسول اور خاتم النبیین ہیں اور آپ سے پہلے تمام انبیاء اور رسول برحق ہیں ۔

تیسرا عقیدہ آخرت کا ہے کہ اس زندگی کے بعد ایک اور بھی زندگی ہے جس کو آخرت کہاجاتاہے، جو کچھ انسان اس دنیا میں کرے گا، اسے اللہ تعالی کے سامنے کھڑا ہو کر جواب دینا پڑے گا،اوریہ عقیدہ سب انبیاء کرام کا رہا، اس لیے کہ دین کا تصور اس کے بغیر ادھورا ہوتاہے ۔

باقی دوسرے عقائد:

باقی دوسرے عقائد بھی ہیں ،جیسے اللہ کے فرشتوں پرایمان لانا ، اللہ کی کتابوں پر ایمان لانا ، اچھی بری تقدیر پر ایمان لانا اور مرنے کے بعد دوبارہ زندہ ہونے پر ایمان لانا ۔

اللہ کے فرشتوں پر ایمان لانا:

اس بات کا بھی یقین رکھنا کہ اللہ کی کی ایک مخلوق فرشتے بھی ہیں ، اللہ نے فرشتوں کونور سے پیدا کیااوراللہ تعالی نے فرشتوں کوجس کام میں لگادیا ہے ، اسی کام میں وہ لگے ہوئے ہیں ، فرشتوں کی تعداد اللہ کے علاوہ کوئی نہیں جانتا، لیکن فرشتوں میں چاربڑے فرشتے یہ ہیں :

(۱)جبرائیل : انبیاء کرام علیہم السلام پر کتابیں اور اللہ کے احکام لاتے ہیں ۔

(۲)میکائیل : بارش کا انتظام اور روزی پہنچانے کاکام کرتے ہیں ۔

(۳)اسرافیل: قیامت کے دن صور پھونکیں گے ، جس سے ساری کائنات فنا ہوجائے گی۔

(۴)عزرائیل: جان نکالنے کے لئے مقر رہیں ۔

اللہ کی کتابوں پر ایمان لانا:

اللہ تعالی نے انبیائے سابقین پر بھی اپنی کتابیں بھیجیں ہیں ، جن پر ایمان لانا او ران کو اللہ کی برحق کتابیں ماننا ضروری ہے ، اللہ تعالی کی چار مشہور کتابیں یہ ہیں :

(۱) توریت : حضرت موسی علیہ السلام پر نازل ہوئی ۔

(۲)زبور: حضرت داؤد علیہ السلام پر نازل ہوئی ۔

(۳)انجیل : حضرت عیسی علیہ السلام پرنازل ہوئی ۔

(۴) قرآن : حضرت محمدصلی اللہ علیہ وسلم پر نازل ہوئی ۔

اچھی بری تقدیر پر ایمان لانا:

اس بات کا بھی عقیدہ رکھنا ضروری ہے کہ ہر اچھی بری چیز اللہ کی طرف ہے ، جو کچھ انسان زندگی میں کرتاہے ، یا پاتاہے ، وہ سب اس کی تقدیر میں لکھا ہوا ہے ،مثلاً: روزی کہاں سے آئیگی ، شادی کہاں ہوگی ، کتنے بچے ہوں گے ، موت کہاں ہوگی ، غرضیکہ ساری چیزیں اس کی تقدیر میں لکھی ہوئی ہوتی ہیں ، ہراچھی بری بات جو بھی اس کوزندگی میں پیش آئے گی، سب اس کی تقدیر میں لکھی ہوئی ہے ۔

مرنے کے بعد جی اٹھنے پر ایمان لانا:

مرنے کے بعد ایک دن ایسا آئے گا کہ ساری دنیا کے لوگ پھر سے زندہ ہوجائیں گے ، اس کی شکل یہ ہوگی کہ حضرت اسرافیل علیہ السلام صورپھونکیں گے ، مردے زندہ ہوکرکھڑے ہوجائیں گے ، پھرسب کا حساب وکتاب ہوگا، اس بات پر یقین رکھنا بھی ضروری ہے، چونکہ اس دن اچھے برے اعمال تولیں جائیں گے ، ان کا حساب ہوگا، جہاں نیکو کاروں کو ان کا نامہ اعمال داہنے ہاتھ میں دیا جائے گااور وہ جنت میں جائیں گے، جبکہ بدکاروں کو ان کانامہ اعمال بائیں ہاتھ میں دیا جائے گا اور وہ جہنم میں جائیں گے ۔

اللہ ہی ہر چیز کا خالق ومالک ہے:

عزیزو! غور سے سن لو کہ آج سے تم اپنے اس عقیدے کو پختہ اور مضبوط کرو گے کہ آسمان وزمین اور ان کے درمیان میں تمام چیزوں کا پیدا کرنیوالا اللہ ہے ، اور زمین وآسمان کا نظام بھی اللہ کے حکم سے چلتاہے : ’’ اَلَّذِیْ خَلَقَنِیْ فَہُوَ یَہْدِیْنِ وَالَّذِیْ ہُوَ یُطْعِمُنِیْ وَیَسْقِیْنِ وَاِذَا مَرِضْتُ فَہَوَ یَشْفِیْنِ وَالَّذِیْ یَمِیْتُنِیْ ثُمَّ یُحْیِیْنِ‘‘(۱) اللہ ہی پیدا کرتاہے ، اللہ ہی مارتاہے ، اور اللہ ہی دوبارہ زندہ کرے گا، اللہ ہی ہدایت دیتاہے ، اللہ ہی بیماری دیتاہے ، اللہ ہی شفا دیتاہے اللہ ہی کھلاتاہے ، اللہ ہی پلاتاہے ، اللہ ہی اولاد دیتاہے ، کسی میں کوئی طاقت نہیں کہ وہ کسی جان کو پیدا کردے اور کسی کی ہمت نہیں کہ وہ کسی کو ماردے ، مگر جب اللہ کا حکم آجائے تو کوئی بھی سبب بن سکتاہے ، اللہ ہی نفع پہنچاتاہے ، اللہ ہی نقصان پہنچاتاہے، اللہ کے علاوہ پور ی دنیا مل کر تم کو نقصان پہنچانا چاہے یا نفع پہنچانا چاہے تو کوئی نہیں ہے اللہ کے سواجو نفع یا نقصان پہنچائے ۔

اللہ کے حکم کے بغیر پتہ بھی نہیں ہل سکتا:

میرے بھائیو! اس بات کی گرہ باندھ لو کہ اللہ کے حکم کے بغیر ایک پتہ بھی نہیں ہل سکتا، اللہ کے حکم کے بنا ایک ذرہ بھی نہیں اڑسکتا، اللہ کے علاوہ کسی میں پیدا کرنے کی طاقت نہیں ، اللہ کے علاوہ کسی میں موت دینے کی طاقت نہیں ، اللہ کے علاوہ کسی میں شفا ء دینے کی طاقت نہیں ، اللہ کے علاوہ کسی میں نفع نقصان پہنچانے کی طاقت نہیں ، اللہ کے علاوہ کسی میں اولاد دینے کی طاقت نہیں ، کوئی دوا اس وقت تک فائدہ نہیں پہنچاسکتی جب تک کہ اللہ کا حکم نہ ہو ، کوئی انجکش اس کے حکم کے بغیر آرام نہیں پہنچاسکتا، جادو ، سحر ، ٹونا اور ٹوٹکا انسانی زندگی میں تصرف نہیں کرسکتا’’اِلاَّبِاِذْنِ اللّٰہِ‘‘ مگر اللہ کے حکم سے ۔

ہر چیز پر اللہ کی حکمرانی ہے:

دوستو! تم ہوا میں اڑو، سمندرمیں تیرو ، دنیا کا چکر لگاؤ، چاندپر پہنچو ، ستاروں پر کمندیں ڈالو، مگر یا درکھو’’اَلاَ لَہُ الْخَلْقُ وَالْاَمْرُ‘‘(۱) اللہ ہی کے حکم سے سب کچھ ہے ، اسی کے قبضہ میں سب کچھ ہے ، اسی کے تصرف میں سب کچھ ہے ، اللہ سے مانگو، اللہ دے گا، اولاد اللہ دے گا، شفاء اللہ دے گا، روزی اللہ دے گا، راحت اللہ دے گا، یاد رکھنا آج کے بعد غیر اللہ کے سامنے سجدہ نہ کرنا،سرنہ جھکانا، اللہ کو چھوڑ کر کسی فقیر، پیر ، ولی، غوث ، ابدال اور صاحب قبر یا پجاری سے نہ مانگنا، کسی کے سامنے ہاتھ نہ پھیلانا، اللہ کے علاوہ کسی کو صاحب تصرف نہ سمجھنا’’اِنِ الْحُکْمُ اِلاَّ لِلّٰہِ‘‘(۲)ہر چیز پر اللہ کی حکمرانی ہے ۔

عقیدہ کی پختگی ضروری ہے:

دینی بھائیو! اگر آج تم نے تمام شرکیہ باتوں سے توبہ کرلی اوریہ عقیدہ ذہن میں بٹھالیا کہ سب کچھ اللہ کے حکم سے ہے ، اللہ نے ہی اس کائنات کو اور دنیا کے نظام کو بنایا اور وہی اس کو چلاتاہے، اور حضوراکرم صلی اللہ علیہ وسلم اللہ کے آخری پیغمبر ہیں ، اب قیامت تک کوئی نبی نہیں آئے گا، اور آپ کی شریعت پر چلے بغیر نجات نہیں ہوگی ، ان باتوں کو ذہن میں رکھ کر اگر تم نے اللہ کے احکامات کو مانا، اس کے رسول کی سچی پیروی کی اور شریعت پر مکمل عمل کیا تو خدا کی قسم کھا کر کہتاہوں کہ تمہاری جنت پکی ہے ۔

اللہ تعالی ہم تمام کو اپنے عقائد درست کرنے کی توفیق عطا فرمائے، اور شریعت کے احکامات پر عمل کرنے کی ہمت وتوفیق عطا فرمائے ۔

(ماخوذ کتاب : عقائد اور ارکان اسلام، تالیف : مولانا قاری مفتی محمد مسعود عزیزی ندوی خلیفۂ مجاز حضرت مولانا ظریف احمدصاحب قاسمی ندوی مدنی مدظلہ خلیفہ مجازمفکر اسلام حضرت مولانا سیدابو الحسن علی حسنی ندوی نوراللہ مرقدہ)

پیشکش : سلسلہ عقائد اسلام، شعبہ تحفظ اسلام میڈیا سروس، مرکز تحفظ اسلام ہند