Sahaba Kiraam R.A Ki Gustakhi Badtarin Amal Hai, Bugz-e-Sahaba Dar Haqiqat Bugz-e-Rasul Hai!

Sahaba Kiraam R.A Ki Gustakhi Badtarin Amal Hai, Bugz-e-Sahaba Dar Haqiqat Bugz-e-Rasul Hai!

Markaz Tahaffuz-e-Islam Hind Ke Online Azmat-e-Sahaba Conference Se Maulana Abu Talib Rahman Aur Maulana Farooq Habban Ka Khitaab!

Bangalore, 16 Sept (M.T.I.H): Markaz Tahaffuz-e-Islam Hind Ke Zer E Aehtemam Munaqqid Online Azmat-e-Sahaba Conference Ke Paanchvin Nashist Se Khitaab Karte Howe All India Muslim personal Law Board Ke Member Hazrat Maulana Abu Talib Rahmani Saheb DB Ne Farmaya Keh Ham Nabi Karim Sallallahu Alaihi Wasallam Ke Zamane Se Bahut Door Ho Chuke Hain, Jis Ki Wajah Se Ek Ke Baad Digare Fitne Ubhar Rahe Hain, Goya Keh Ham Mukammal Fitnon Ke Daor Men Aachuke Hain, In Fitnon Men Se Ek Fitnah Khatm E Nubuwwat Sallallahu Alaihi Wasallam Aur Namus E Sahabah Kiraam Raziyallahu Anhum Par Dakah Daalna He. Maulana Ne Farmaya Keh Allah Ke Nabi Sallallahu Alaihi Wasallam Aakhri Nabi O Rasul Hain Aap Ke Baad Qayamat Tak Koi Nabi O Rasul Nahin Aayega, Agar Koi Nabi O Rasul Hone Ka Dawaa Kare To Woh Ek Number Ka Jhuta O Makkaar Hai. Aur Isi Tarah Aap Sallallahu Alaihi Wasallam Ke Sahabah Kiraam Raziyallahu Anhum Ki Jamaat Bhi Aakhri Jamaat Hai, Nabi Karim Sallallahu Alaihi Wasallam Par Nubuwwat Khatm Aur Sahabah Par Sahabiyat Khatm Hai. Unhon Ne Farmaya Keh Anbiyaa Ke Baad Puri Ummat Men Sab Se Afzal Sahabah Kiraam Raziyallahu Anhum Ki Jamaat Hai. Maulana Rahmani Ne Wazeh Alfaaz Men Farmaya Keh Puri Dunyaa Ke Auliyaa, Iqtaab, Abdaal Sab Mil Kar Bhi Kisi Ek Sahabi Ke Maqaam Ko Nahi Pohonch Sakte, Is Liye Ham Tamaam Ko Sahabah Kiraam Raziyallahu Anhum Ki Qadr Karni Chahiye, Unka Adab O Aehteraam Karna Chahiye Kiun Keh Unse Muhabbat Hubb E Nabawi Ki Dalil Hai Aur Un Se Bugz O Nafrat Nabi Se Bugz O Adawat Ke Mutaradif Hai.

Azmat-e-Sahaba Conference Ke Chatwin Nashist Se Khitaab Karte Howe Janasheen Habibul Ummat Hazrat Maulana Dr.Muhammad Hakim Farooq Azam Habban Qasmi Sb DB Ne Farmaya Keh Sahabah Kiraam Raziyallahu Anhum Din Ke Sutun Hain, Hazraat E Sahabah Kiraam Raziyallahu Anhum Ki Tasdiq Qur'aan E Paak Ne Ki Hai Aur Hazraat E Sahabah Kiraam Raziyallahu Anhum Woh Hain Jinhon Ne Allah Ke Nabi Sallallahu Alaihi Wasallam Ki Surat O Sirat Ko Dekha Aur Mukammal Taur Par Aap Ki Sirat Par Amal Kiya. Maulana Ne Farmaya Keh Hazraat E Sahabah Kiraam Raziyallahu Anhum Ki Sari Khubiyaan Nabi Karim Sallallahu Alaihi Wasallam Hi Ka Fayez Hai, Is Liye Sahabah Kiraam Raziyallahu Anhum Ki Gustakhi Karna Aqalmandi Nahin, Balkeh Bad Aqli Ki Alamat Hai. Lihaaza Hazraat E Sahabah Kiraam Raziyallahu Anhum Se Muhabbat Karen Unki Izzat Karen Aur Adab O Aehteraam Ko Malhuz Rakhen. Qabil E Zikr Yeh Hai Keh Markaz Tahaffuz-e-Islam Hind Ka 15 Rozah Online Azmat-e-Sahaba Conference Ko Rozanah Raat 9:30 Baje Markaz Ke Official YouTube Channel Aur Facebook Page Tahaffuz-e-Islam Media Service Par Dunya Bhar Se Hazaron Afraad Dekh Aur Sun Rahe Hain. Conference Se Mulk Ke Mash Hur O Maruf Akabir Ulama E Kiraam Khitaab Kar Rahe Hain. Markaz Ke Organiser Hafiz Muhammad Hayaat Khan Ne Ek Baar Phir Puri Ummat E Muslimah Ko Is Azimush Shaan Conference Men Shirkat Ki Apil Hai.