VIDEO : https://youtu.be/N3pslqJglpw
🎯 حیدرآباد سیلاب سے متعلق ایک اہم پیغام | مولانا محمد رضوان حسامی (ناظم اعلیٰ مرکز تحفظ اسلام ہند)
🎯Hyderabad Flood Se Mutalliq Ek Ahem Paigham | Moulana Rizwan Husami DB (Nazim-e-Ala Markaz Tahaffuz-e-Islam Hind)
🎯हैदराबाद सैलाब से मुतालिक एक अहम पैग़ाम | मौलाना रिज़वान हुसामि (नाजिमे आला मर्कज़ तहफ्फुज-ए-इस्लाम हिंद)
Presented By:
Tahaffuz-e-Islam Media Service
(Bangalore, Karnataka, India)
Urdu Newspapers | 16 Oct 2020
⭕️Moulana Syed Talha Qasmi Naqshbandi Sb DB Speech In Online Azmat-e-Sahaba Conference By Markaz Tahaffuz-e-Islam Hind
حضرات صحابہ کرامؓ کی شان اقدس میں گستاخی کرنے والا لعنتی ہے!
مرکز تحفظ اسلام ہند کی آن لائن عظمت صحابہ کانفرنس کی اختتامی نشست سے مولانا سیدطلحہ قاسمی نقشبندی کا خطاب!
بنگلور، 15/ اکتوبر (ایم ٹی آئی ہچ): مرکز تحفظ اسلام ہند کی آن لائن عظمت صحابہؓ کانفرنس کی تیسویں و آخری نشست سے خطاب کرتے ہوئے شیخ طریقت مولانا سید طلحہ قاسمی نقشبندی مدظلہ نے فرمایا کہ حضرات صحابہ کرامؓ کو اللہ کے رسولؐ کی نسبت حاصل ہے، وہ اصحاب محمدؐ ہیں۔ حضرت عبداللہ بن مسعودؓ نے ارشاد فرمایا کہ رسول اللہؐ کے یہ صحابہ ایسی منتخب جماعت ہیں جنکا انتخاب خود اللہ تعالیٰ نے اپنے نبیؐ کا ساتھی بنانے اور آپکے دین کو ساری دنیا میں پھیلانے کے لیے کیا ہے۔اور پھر فرمایا کہ ساری دنیا کے انسانوں میں سب سے زیادہ پاک دل اور نیک دل والے حضرات صحابہؓ تھے۔ اللہ تعالیٰ نے اس جماعت کو سب سے گہرا علم عطاء کیا تھا اور دوسرے تمام انسانوں کے مقابلے میں انکی زندگیاں ہر قسم کی بناوٹ سے خالی ہیں، انکا جو ظاہر ہے وہی باطن ہے، انکا جو باطن ہے وہی ظاہر ہے۔ مولانا نے فرمایا کہ اللہ تعالیٰ نے حضرات صحابہؓ کو اللہ کے نبیؐ کے ساتھ بہت سارے معاملات اور صفات میں شریک بنایا ہے، اپنے نبیؐ کے ساتھ ایسی معیت کاملہ اور معیت تامہ نصیب فرمائی تھی کہ صحابہؓ کو الگ کرکے حضورؐ کی نبوت، سیرت، اور شخصیت کو نہیں سمجھا جاسکتا، اور حضورؐ کو الگ کرکے صحابہؓ کے کمالات و صفات کو نہیں سمجھا جاسکتا۔ مولانا طلحہ قاسمی نے قرآن پاک کی ایک آیت کا مفہوم بیان کرتے ہوئے فرمایا کہ حضرات صحابہؓ وہ ہیں جنکو محمد رسول اللہؐ سے جدا نہیں کیا جاسکتا۔ حضرات صحابہ کرامؓ حضورؐ کی محنت کا نتیجہ ہیں۔ مولانا نے بہت ساری مثالیں دیتے ہوئے دو ٹوک فرمایا کہ جو لوگ حضرات صحابہؓ کو لعن طعن کرتے ہیں، حضرات صحابہؓ کو ملامتوں کا نشانہ بناتے ہیں، اور نعوذبااللہ جو لوگ اپنی صریح گفتگو سے یہ سمجھانا چاہتے ہیں کہ ادھر حضورؐ کی آنکھیں بند ہوئیں اور ادھر حضرات صحابہ کرامؓ دنیا کی لالچ میں حضورؐ کا طریقہ چھوڑ کر کے نامعلوم کیا سے کیا ہوگئے، تو وہ محمدؐ کو دنیا کا سب سے ناکام انسان کہہ رہے ہیں۔ مولانا طلحہ نقشبندی نے فرمایا کہ نبی کریمؐ قیامت تک کے لیے نبی و رسول ہیں تو آپکا ہر کام قیامت تک پہنچے گا، اب جو لوگ صحابہ کرامؓ کی شان میں گستاخی کرتے ہوئے کہتے ہیں کہ نعوذبااللہ صحابہ کرامؓ اقتدار کے نشے میں آپس میں لڑ پڑے اور ایسے ویسے ہوگئے تو یہ لوگ حضورؐ کو ناکام کہہ رہے ہیں کہ انکا پہلا طبقہ ہی محفوظ نہیں رہا تو انکا دین کہاں محفوظ ہے۔ اور آپ ؐخاتم النبیین کیسے ہو سکتے ہیں؟ مولانا نقشبندی نے فرمایا کہ ہمارا ایمان ہے کہ صحابہ کرامؓ کو اللہ کے نبیؐ نے ایمان کے جس اعلیٰ معیار پر چھوڑا اس دنیا سے رخصت ہوتے وقت صحابہ کرامؓ نے اپنے ایمان کی حفاظت فرمائی، صحابہ کرامؓ نے رسول اکرمؐ کے ساتھ وفاداری کا حق ادا کیا۔ اور اگر کسی مسئلے میں صحابہؓ کے درمیان اختلاف ہوا تو ان میں سے ہر ایک کامل مخلص تھا، اور اخلاص کے ساتھ انہوں نے اپنی رائے قائم کی اور ایمانداری کے ساتھ اس پر رہے۔ اس سے زیادہ ہم صحابہؓ کے بارے میں کچھ نہیں کہہ سکتے۔ ہمیں حضرات صحابہؓ سے حسن ظن رکھنا چاہیے، حضرات صحابہ کرامؓ کو جو مقام ملا ہے، جو نسبت ملی ہے وہ حضورؐ کی صحبت با برکت کی وجہ سے ملا ہے، لہٰذا ساری دنیا کے اولیاء ملکر بھی کسی صحابی کے مقام کو نہیں پہنچ سکتے۔ مولانا نے حدیث کا حوالہ دیتے ہوئے دوٹوک فرمایا کہ حضرات صحابہؓ کی شان میں گستاخی کرنے والا لعنتی ہے، اس کے شر پر اللہ و رسولؐ کی، ایمان والوں کی اور فرشتوں کی لعنت ہے۔ اور جو لوگ صحابہؓ کی شان میں گستاخی کرتے ہیں انکا اہل بیت سے کوئی تعلق نہیں، انکا تعلق روافض اور نواصب سے ہے۔ قابل ذکر ہے کہ مولانا سید طلحہ قاسمی نقشبندی مدظلہ نے مرکز تحفظ اسلام ہند کی خدمات کو سراہتے ہوئے خراج تحسین پیش کیااور بہت ساری دعاؤں سے نوازا۔ ایک ماہ سے زائد عرصے سے جاری آن لائن عظمت صحابہ کانفرنس مولانا کی پُر سوز دعاء پر اختتام پذیر ہوا۔
حضرات صحابہ کرامؓ کے بغیر دنیا اسلام سے خالی ہے، صحابہ پر زبان درازی کرنے سے بچیں!
مرکز تحفظ اسلام ہند کی آن لائن عظمت صحابہؓ کانفرنس سے مولانا صلاح الدین قاسمی اور مفتی ناصر ایوب ندوی کا خطاب!
بنگلور، 14/ اکتوبر (ایم ٹی آئی ہچ): مرکز تحفظ اسلام ہند کی آن لائن عظمت صحابہؓ کانفرنس کی انتیسویں نشست سے خطاب کرتے جمعیۃ علماء ضلع بنگلور کے صدر مولانا محمد صلاح الدین ایوبی قاسمی مدظلہ نے فرمایا کہ آج پوری دنیا میں اسلام اور مسلمانوں کو بدنام کرنے کے لیے طرح طرح کی کوششیں جاری ہیں لیکن یہ بات طئے ہے کہ دنیا کی کوئی طاقت اسلام کو مٹا نہیں سکتے۔ اس لیے کہ اللہ تعالیٰ نے اسلام کے اندر ایک ایسی لچک رکھ دی ہے کہ جتنا ہی اسے دبائیں گے اتنا ہی وہ ابھرے گا۔ مولانا نے فرمایا کہ دشمنانِ اسلام شروع ہی سے اس کوشش میں لگے ہوئے ہیں کہ عام بھولے بھالے مسلمانوں کو اسلام کی دعوت و تبلیغ سے روکا جائے اور اسلام سے متنفر کرایا جائے اور اس کے لیے طرح طرح کے حربے استعمال کررہے ہیں، جن میں سے ایک حضرات صحابہؓ پر سے اعتماد کو ختم کرنا ہے، صحابہ کرامؓ پر طعن و تشنیع کے ذریعے انکی شخصیت کو مجروح کردیا جائے۔ حالانکہ حضرات صحابہؓ ہی کے ذریعے آج ہمارے پاس قرآن موجود ہے، اسلام کے سارے شعبے حضرات صحابہؓ ہی کی دین ہیں۔مولانا نے فرمایا کہ حضرات صحابہؓ اللہ کے نبیؐ کے عشق میں ڈوبے ہوئے تھے، ذرا برابر بھی ان سے اللہ و رسول ؐکی نافرمانی نہیں ہوئی، یہی وجہ ہے کہ حضرات صحابہؓ کو اللہ نے رضی اللہ عنہ کا مژدہ سنایا اور اللہ کے نبیؐ نے ستاروں کے مانند قرار دیکر کہا کہ جس کسی کی بھی اقتدا کرلو گے تو کامیاب ہو جاؤ گے۔ مولانا قاسمی نے فرمایا کہ حضراتِ صحابہؓ وہ ہیں جن پر ایمان لانے کی وجہ سے انکے رشتہ داروں، دوستوں نے تک ظلم کیا، کسی صحابی کو حصیر میں لپیٹ کر نیچے سے آگ کا دھواں دیا جاتا، کسی کو ننگا بدن عرب کی تپتی ہوئی ریت پر لٹا کر اوپر بھاری بھر کم چٹان کو رکھ دیا جاتا، اتنی ساری تکلیفوں، مصیبتوں کو برداشت تو کرلیا مگر ایمان کا سودا نہیں کیا۔ مولانا نے فرمایا کہ حضرات صحابہؓ ہیں تو امت ہے، حضراتِ صحابہ ؓہیں تو اسلام ہے، صحابہ کرامؓ کے بغیر دنیا اسلام سے خالی ہے۔ مولانا صلاح الدین قاسمی نے مرکز تحفظ اسلام ہند کی خدمات کو سراہتے ہوئے خوب دعاؤں سے نوازا۔
عظمت صحابہؓ کانفرنس کی ستائیسویں نشست سے خطاب کرتے ہوئے مدرسہ فیض العلوم خانقاہ بوڑیہ کے رفیق مفتی ناصر ایوب ندوی مدظلہ نے فرمایا کہ حضراتِ صحابہؓ وہ لوگ ہیں جنکے دلوں کو اللہ تعالیٰ نے تقوی کے لیے خالص کردیا ہے، انکے لیے مغفرت کا اعلان اور اجر عظیم ہے۔ جن کے بارے میں رسول اللہؐ نے فرمایا کہ میرے صحابہ ستاروں کے مانند ہیں، جسکی بھی اقتدا کرو گے راستہ پا جاؤ گے۔ مولانا نے فرمایا کہ اللہ تعالیٰ نے دین کی حفاظت اور اسکی سر بلندی کے لیے حضرات صحابہؓ کی پاکیزہ اور مقدس جماعت کو چنا اور حضرات صحابہؓ نے دین کی حفاظت کے لیے تن من دھن کی بازی لگادی۔ تاریخ گواہ ہے کہ ان سچے جانثاروں نے دین اسلام کی خاطر وہ قربانیاں پیش کی ہیں کہ جسکی نظیر پیش کرنے سے عالم انسانیت تہہ دامن سے خالی ہے۔ مولانا نے فرمایا کہ یہی وہ صحابہؓ ہیں جنہوں نے پیغام خداوندی اور سنت مصطفوی کو عام کرنے کے لیے اپنی گردنیں کٹا دیں، اپنی بیویوں کو بیوہ اور بچوں کو یتیم کردیا، یہی وہ صحابہؓ ہیں جنہوں نے آفتاب ہدایت سے بلا واسطہ نور حاصل کیا، یہی وہ صحابہؓ ہیں جنہوں نے ہمیشہ ہمیش کے لیے آخرت کو دنیا پر ترجیح دی، یہی وہ صحابہؓ ہیں جو حق و صداقت کا مجسم نمونہ تھے، یہی وہ صحابہؓ ہیں جو سربکف مجاہد تھے، یہی وہ صحابہؓ ہیں جنکی نعش کو فرشتوں نے غسل دیا تھا، یہی وہ صحابہؓ ہیں جو موت سے نہیں بلکہ موت ان سے ڈرتی تھی، یہی وہ صحابہؓ ہیں جنکو سمندروں نے راستہ دیا۔ لیکن افسوس کہ ساتھ یہ کہنا پڑھ رہا ہے کہ آج کچھ لوگ حضرات صحابہؓ کی شان میں گستاخی کر رہے ہیں، صحابہ کرامؓ کو طعن و تشنیع کا نشانہ بنا رہے ہیں۔مفتی ناصر ایوب ندوی نے فرمایا کہ حضرات صحابہ کرامؓ بہت ہی مقدس اور بابرکت ہستیاں ہیں اس لیے صحابہ کی شان میں گستاخی کرنے سے بچنا چاہیے۔
