Nabi E Akram Sallallahu Alaihi Wasallam Ki Shan Mein Ghustakhi Naqaabil E Qubool

 

Nabi E Akram Sallallahu Alaihi Wasallam Ki Shan Mein Ghustakhi Naqaabil E Qubool: Jamiat Ulama-i-Karnataka

Bangalore Mein Kasheedgi Aur Fasaad Ki Wajah, Police Ki Laparwahi!

Bangalore, 12 August (Mohammed Furqan): Pichle Dinon Nabi E Akram Sallallahu Alaihi Wasallam (S.A.W)  Ki Shan E Aqdas Mein Ghustakhi Karte Hue Bangalore Ke D.J Halli Ilaqe Ke M.L.A Ke Bhanje P. Naveen Ne Facebook Par Ghustakh Aamez Post Dali Thi. Jiski Wajah Se Shehr Mein Kasheedgi Phel Gayi. Maqami Log Jab Muqadma Darj Karwane Police Station Pahunche To Wahan Muqadma Darj Karne Mein Takheer Balki Taal-Matol Kiya Gaya, Jiski Wajah Se Ilaqe Mein Fasaad Barpa Hua Aur Kafi Jani W Mali Nuqsan Hua. Is Waqiye Ki Purzor Mazammat Karte Hue Jamiat Ulama-i-Karnataka Ne Kaha Ki, "Agar Waqt Rehte Maqami Masajid Ke Zimmedaran Ki Shikayat Lekar Police Ghustakh E Rasool Par Karwayi Karti To Aaj Yeh Halaat Na Dekhne Ko Milte, Fasaad Ka Yeh Poora Waqiya Police Ki Laparwahi Ki Wajah Se Pesh Aya Hai. Kyunki Musalman Sab Kuch Bardasht Kar Sakta Hai Lekin Apne Aaqa Hazrat Muhammad Rasoolullah Sallallahu Alaihi Wasallam (S.A.W) Ki Shan E Aqdas Mein Zarra Barabar Bhi Ghustakhi Bardasht Nahin Kar Sakta".

Jamiat Ulama Ne Fasaad Ke Dauran Hue Mali Nuqsan Ki Bharpayi Musalmanon Ki Niji Imlaak Ke Zariye Karne Ki Hukumat Ke Faisle Par Sakht Tanqeed Karte Hue Wazeh Taur Par Kaha Ki, "Agar Hukumat Ka Yeh Faisla Hai Toh Hukumat Ko Chahiye Ki Shehr Mein Kasheedgi Aur Fasaad Phelane Ke Jo Asal Zimmedar Hein Woh Awwalan Khustakh E Rasool P. Naveen Hai Aur Doosra Police Mehekma Hai, Jiski Laparwahi Ki Wajah Se Yahan Tak Mamla Pahuncha, Lihaza Is Poore Waqiye Ki Bharpayi Unki Milkiyat Se Ki Jaye". Jamiat Ulama Ne Kaha ki, "Der Raat Jab Ilaqe Mein Kasheedgi Phel Chuki Thi, Toh Kuch Muslim Naujawanon Ne Ilaqe Mein Maujood Ek Mandir Ko Human Chain Ke Zariye Mehfooz Karte Hue Poore Mulk Ko Amn O Amaan Aur Ganga-Jamuni Tehzeeb Ka Paigham Diya, Jisko Jamiat Ulama Qadr Ki Nigaah Se Dekhti Hai". Is Waqiye Ki Khabar Jese Hi Jamiat Ulama-i-Hind Ke Sadar Mohtaram Hazrat Maulana Syed Arshad Madni Sb Ko Pahunchi Toh Unhone Sakht Ranj O Gham Ka Izhaar Karte Hue Tauheen Aamez Post Aur Fasaad Ki Mazammat Ki Aur Farmaya Ki, "Shehr Mein Amn O Amaan Ki Fiza Qayam Karein Aur Ghustakh E Rasool Ko Qanoon Ke Mutabiq Hukumat Sakht Se Sakht Saza De". Is Mauqe Par Jamiat Ulama-i-Karnataka Ke Sadar Maulana Abdur Rahim Rasheedi, Naib Sadar Maulana Shameem Salik Mazahiri, General Secretary Janab Muhibbullah Khan Ameen, Rukn E Aamilah Hafiz Yal Farooque Waghera Maujood The.


🎁 Peshkash : Shoba e Tahaffuz-e-Islam Media Service, Markaz Tahaffuz-e-Islam Hind